«Евровидение» қўшиқлар танловининг якуний босқичи 2023 йил 13 май куни Буюк Британиянинг Ливерпуль шаҳрида бўлиб ўтади. Бу ҳақда телебошловчи ва актёр Грем Нортон BBC телеканали орқали маълум қилди.
Танловни ўтказиш ҳуқуқига даъвогарлар рўйхатига дастлаб Британиянинг еттита шаҳри кирганди (Лондон улар орасида йўқ эди). Сентябрь охирида Ливерпуль ва Глазго финалчи даъвогарларга айланди.
«Евровидение-2023» дастлаб Украинада ўтказилиши керак эди, чунки 2022 йилда танловда Украинанинг Kalush Orchestra гуруҳи ғолиб бўлганди. Июнь ойида Европа узатув кенгаши жанговар ҳаракатлар туфайли танловни Украина шаҳарларидан бирида ўтказиш мумкин эмаслигини эълон қилди. «Евровидение» ўтказиш ҳуқуқи эса танловда иккинчи ўринни олган Буюк Британияга тақдим этилди.
Британия сўнгги марта 1998 йилда «Евровидение»га мезбонлик қилган эди, ўшанда танлов Бирмингемда ўтказилган. Лондонда эса танлов охирги марта 1977 йилда бўлиб ўтган. 2023 йил танлов мамлакат учун тўққизинчисига айланади.
«Евровидение-2022» танлови Италиянинг Турин шаҳрида ўтказилган эди. Унда Украинанинг Kalush Orchestra гуруҳи Стефаниа қўшиғи билан ғолиб бўлган, британиялик Сем Райдер эса Space ман композицияси билан иккинчи ўринни эгаллаганди. Россия Украинадаги вазият туфайли, бу йил танловдан четлатилганди.
Танлов 1956 йилдан буён ўтказиб келинади.
Изоҳ (0)