Украина президенти Владимир Зеленский даъво қилишича, у яқинда Россияга «превентив зарба» бериш ҳақида гапирганида ҳарбий чораларни эмас, санкцияларни назарда тутган. Бу ҳақда у BBC нашрига берган интервьюсида маълум қилди.
«Мен ‘превентив зарба’ деганим инглиз тилида preventive kick бўлади, attack эмас. Бу бошқа-бошқа нарсалар. Шунинг учун ҳам инглизча ёки украинча гапираётганингизда, у максимал даражада тўғри таржима қилиниши муҳимдир, чунки россияликлар ундан ҳар доим ҳозиргидек фойдаланади», — деди Зеленский.
Украина президенти айтишича, Россия Украинага бостириб киришидан аввалроқ у «превентив зарбалар, санкциявий зарбалар мавзуси»ни кўтарган. 24 февралдан кейин, деди у, «Европа жамияти, аввало Британия» Россия уруш бошлашга қўрқиши учун «ўзлари иштирок этиши, санкциялар киритиши, превентив зарбалар бериши керак бўлгани»ни тан олган.
«Энди эса — улар ядро қуроли ҳақида носоғлом ғояларини айтаётган бир пайтда, мен уларга ўзларининг жамияти билан бу ҳақда гаплашишларига йўл қўйманг, деяпман. Улар ўз жамиятини тайёрлашни бошламоқда. Бу жуда хавфли… Улар ундан фойдаланиладими, йўқми — билмайди. Менимча, бу ҳақда гапириш ҳам хавфли. Шунинг учун ҳам мен превентив ҳужум эмас, зарба беришингиз керак деб айтдим. Мана шуни назарда тутгандим.
Россияликлар эса бу сўзларни ўзларига қулай қилиб таржима қилди ва ҳамма жойда такрорлай бошлади. Мен эса санкцияларни кўзда тутгандим. Агар улар «ядро қуроли» ҳақида гапирган бўлса, ҳатто бу ҳақда ўйлаган бўлса ҳам — сиз уларни киритишингиз керак. Сизда ядровий санкциялар пакети бор, Европада уларни жорий қилиш имконияти мавжуд — масалан, улар бизнинг АЭСни эгаллаб олганига жавобан. Бу жуда хавфли. Мана мен нимани назарда тутяпман», — деди Украина президенти.
Зеленский нима деганди?
6 октябрь куни кечқурун Украина президенти Австралиянинг сиёсий ва иқтисодий тадқиқотлар билан шуғулланувчи Лоуи институти тадбирида видеоалоқа орқали сўзлаган нутқи катта шов-шувга сабаб бўлди. «НАТО нима қилиши керак? Россиянинг ядро қуролидан фойдаланиш эҳтимолини йўқ қилиш лозим. Лекин энг муҳими, худди 24 февралгача бўлгани каби мен яна бир бор халқаро ҳамжамиятга мурожаат қиламан: агар ядро қуролдан фойдаланилса, уларнинг тақдири нима бўлишини билишлари учун олдиндан зарба бериш керак. Россиянинг ядровий зарбаларини кутиб, улардан кейин зарба бергандан фойда йўқ», — деди Зеленский.Зеленский превентив ядро зарбасини назарда тутаётгани ёки гап оддий қурол ҳақида кетаётганига аниқлик киритмади. Бироқ Россия ҳукумати вакиллари унинг баёнотини айнан ядро қуролини қўллашга даъват деб қабул қилди. Хусусан, Россия президенти матбуот котиби Дмитрий Песков Украина президентининг нутқини «олдиндан айтиб бўлмайдиган даҳшатли оқибатларга олиб келувчи жаҳон урушини бошлашга даъват» деб атади.
Кейинроқ Украина президентининг матбуот котиби маълум қилишича, Владимир Зеленский НАТОни Россия томонидан ядро қуроли қўлланилишига йўл қўймаслик учун унга превентив зарба беришга чақирмаган.
Украина президенти матбуот котибининг сўзларига кўра, Зеленский превентив чораларни 24 февралгача қўллаш керак бўлгани ҳақида гапирган, «Россия уруш бошлашига йўл қўймаслик учун» «превентив санкциялар» билан чекланиб қолиш керак бўлмагани ҳақида айтган.
Изоҳ (0)