Toshkentda dzyudo bo‘yicha Jahon chempionati start oldi

Toshkent shahri mezbonligida o‘tadigan dzyudo bo‘yicha 2022-yilgi Jahon chempionati 6-oktabr kuni start oldi.

Dastlabki kungi bahslarda o‘zbekistonlik ikki nafar sportchi o‘z ishtirokini o‘tkazdi. Erkaklar bahsida Dilshod Baratov (-60 kg) tatamiga chiqqan bo‘lsa, ayollar safida Halima Qurbonova (-48 kg) ishtirok etdi.

Qurbonova dastlabki bosqichda turkiyalik Merve Azakni mag‘lub etdi, biroq keyingi bosqichda italiyalik Assunta Skuttoga imkoniyatni boy berib, o‘z yurishini to‘xtatdi.

Baratov Muhammad Akkash (IJF), Artyom Lesyuk (Ukraina), Li Ha Rim (Janubiy Koreya) va Yam Volshak (Isroil) kabi sportchilarni yengib, yarim finalga chiqdi.

Final ostonasida Dilshod mo‘g‘ulistonlik Ariunbold Enxtayvanga yengildi. Bronza medali uchun kechgan bahsda esa qozog‘istonlik Yeldos Smetovga imkoniyatni boy berdi.

7-oktabr kuni erkaklarda -66 kg, ayollarda esa -52 kg vazn toifasi vakillari tatamiga chiqadi. O‘zbekiston sharafini Sardor Nurillayev, Diyora Keldiyorova va Sita Qadamboyeva himoya qiladi.

Musobaqa 14-oktabrga qadar davom etadi.