Saidyoqub Qahramonov UFC’dagi navbatdagi jangini Said Nurmagomedovga qarshi o‘tkazadi

Yarim yengil vazn toifasida harakat qiluvchi Saidyoqub Qahramonov (9-1) o‘zining navbatdagi jangini 17-dekabr kungi UFC musobaqasida o‘tkazadi.

Unga ushbu jangda rossiyalik Said Nurmagomedov (17-2) raqib bo‘ladi.

Ushbu ma’lumotga aniqlik kiritish uchun “Daryo” o‘zbekistonlik yakkakurashchi bilan bog‘landi. Saidyoqub haqiqatda keyingi raqibini Said Nurmagomedov bo‘lishini tasdiqladi.

Saidyoqub promoushendagi so‘nggi jangini iyul oyida o‘tkazib, unda Ronni Lourensni mag‘lubiyatga uchratgandi. Unga qadar Qahramonov UFC’dagi debyut jangini Guam vakili Trevin Jonsga qarshi o‘tkazib, raqibini bo‘g‘ish usuli bilan mag‘lub etgandi.

Said Nurmagomedov esa oxirgi marta iyul oyida Duglas Silva di Andradini taslim etgandi.

Qayd etish kerak, Said Nurmagomedovning UFC sobiq chempioni Habib Nurmagomedov va uning oilasiga aloqasi yo‘q. Ular shunchaki familiyadosh, xolos.