Toshkent shahrida tibbiy yordamga muhtoj bemorga xizmat ko‘rsatishdan bosh tortgan shifokorlarga hayfsan berildi. Bu haqda Inson huquqlari bo‘yicha vakil (ombudsman) axborot xizmati xabar bermoqda.
Qayd etilishicha, ombudsmanga 4-sonli shahar klinik shifoxonasining shifokorlarining xatti-harakatlaridan norozi bo‘lgan fuqaro murojaati kelib tushgan. Murojaatchining yozishicha, uning onasi avtohalokatga uchrab, I.Irgashev nomli 4-sonli shahar klinik shifoxonasiga olib borilgan. Shifoxonada birinchi tibbiy yordam ko‘rsatilib, Respublika neyroxirurgiya markaziga tibbiy tekshiruv o‘tkazilishi va muolajalar tayinlanishi uchun yuborilgan. Oradan 3 kun o‘tgach, nafaqada bo‘lgan bemorning ahvoli og‘irlashib, og‘riq kuchaygan. Bemor yana o‘sha shifoxonaga olib borilganida uning ahvoli og‘ir bo‘lishiga qaramay, qabul qilinmagan.
Bemor qizining ma’lum qilishicha, bemor travmatolog va xirurg orasida “mening kasalim emas” degan vaj bilan sarson qilingan, shifoxona hamshirasi esa ular bilan qo‘pol muomalada bo‘lib, bemorni tashqariga chiqarib yuborgan. Murojaat ombudsman nazoratiga olinib, holatni o‘rganish va tegishli choralar ko‘rilishi bo‘yicha Sog‘liqni saqlash vazirligiga murojaat yuborilgan.
Vazirlikning javob xatida bayon etilishicha, bemorga 4-son SHKSh tibbiyot xodimlari tomonidan ko‘rsatilgan tibbiy yordam amaldagi standartlar asosida ko‘rsatilgan, lekin rentgen tekshiruvida qovurg‘alardagi darz ketish jarohati mutaxassis tomonidan aniqlanmasdan, xatolikka yo‘l qo‘yilgan. Hamshiraning qo‘pol muomalada bo‘lgani ham o‘z isbotini topgan.
Shu munosabat bilan xato va kamchiliklarga yo‘l qo‘ygan 4 nafar tibbiyot xodimiga 4-son SHKSh ma’muriyati tomonidan hayfsan intizomiy jazo chorasi qo‘llangan.
Izoh (0)