“Ishga mashinasiz kelgan xodimlarni moddiy rag‘batlantirish kerak” — Furqat Mahmudxo‘jayev

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda yangi — “Mahalla. Muammo. Mulohaza” loyihasini boshladi. Ko‘rsatuvning 1-sonida kengash raisi Furqat Mahmudxo‘jayev va deputat Rasul Kusherbayev avtoturargohlar, tirbandliklar mavzusiga doir muammolar bo‘yicha fikr almashdi.

Suhbat davomida Furqat Mahmudxo‘jayev shaharsozlik infratuzilmasini rivojlantirish, yo‘llardagi tirbandliklarning oldini olish bo‘yicha takliflarini bildirdi. Xususan, u mashinalar oqimini kamaytirish bo‘yicha fikrlarini ilgari surib, xodimlarni ishga avtomobilsiz kelishga undash kerakligini aytdi.

— Mana idoralar, yirik kompaniyalar, oddiy tashkilotlar, kichik tadbirkorlik subyektlarimi, shular xodimlarini ishga avtomobilsiz kelishini rag‘batlantirish tizimini yo‘lga qo‘yishi kerak. To‘g‘ri, bu — iltimos, hech kim majbur qilolmaydi. Keyin, ishxonaga avtomobilsiz keldimmi, buning qanaqadir kompensatsiyasi ham bo‘lsin. Balki kelajakda qaysidir kompaniyalar shu usuldan foydalanar.

— Marhamat, metroda kelish uchun bir oylik chipta olib bersin. Yoki mayli, qaysing mashinasiz kelsang, 10—15 daqiqa kechiksang ham indamaymiz, desin.

— Balki moddiy rag‘batlantirish ham bo‘lar. To‘g‘ri, budjet tashkilotida iloji yo‘q, lekin xususiylarda qilsa bo‘ladi.

— Albatta, menga ham bu taklif juda yoqdi. O‘zi vaqti-soati kelib, bizning odamlar ham tushunadiki, avtomobil hasham, havas vositasi emas, balki hayotni qulaylashtiradigan narsa. Ana o‘shanda jamoat transportiga ehtiyoj oshadi. To‘g‘risini aytish kerak, Toshkentda bu soha yaxshi emas. Metro, biroz avtobuslar bor xolos. Biz ko‘p sohasini o‘ldirib qo‘ydik. Ilgari trolleybus, tramvaylar bo‘lardi. Biz bu masalani qayta ko‘rishimiz kerak.