Тошкент шаҳрида тиббий ёрдамга муҳтож беморга хизмат кўрсатишдан бош тортган шифокорларга ҳайфсан берилди. Бу ҳақда Инсон ҳуқуқлари бўйича вакил (омбудсман) ахборот хизмати хабар бермоқда.
Қайд этилишича, омбудсманга 4-сонли шаҳар клиник шифохонасининг шифокорларининг хатти-ҳаракатларидан норози бўлган фуқаро мурожаати келиб тушган. Мурожаатчининг ёзишича, унинг онаси автоҳалокатга учраб, I.Иргашев номли 4-сонли шаҳар клиник шифохонасига олиб борилган. Шифохонада биринчи тиббий ёрдам кўрсатилиб, Республика нейрохирургия марказига тиббий текширув ўтказилиши ва муолажалар тайинланиши учун юборилган. Орадан 3 кун ўтгач, нафақада бўлган беморнинг аҳволи оғирлашиб, оғриқ кучайган. Бемор яна ўша шифохонага олиб борилганида унинг аҳволи оғир бўлишига қарамай, қабул қилинмаган.
Бемор қизининг маълум қилишича, бемор травматолог ва хирург орасида «менинг касалим эмас» деган важ билан сарсон қилинган, шифохона ҳамшираси эса улар билан қўпол муомалада бўлиб, беморни ташқарига чиқариб юборган. Мурожаат омбудсман назоратига олиниб, ҳолатни ўрганиш ва тегишли чоралар кўрилиши бўйича Соғлиқни сақлаш вазирлигига мурожаат юборилган.
Вазирликнинг жавоб хатида баён этилишича, беморга 4-сон ШКШ тиббиёт ходимлари томонидан кўрсатилган тиббий ёрдам амалдаги стандартлар асосида кўрсатилган, лекин рентген текширувида қовурғалардаги дарз кетиш жароҳати мутахассис томонидан аниқланмасдан, хатоликка йўл қўйилган. Ҳамширанинг қўпол муомалада бўлгани ҳам ўз исботини топган.
Шу муносабат билан хато ва камчиликларга йўл қўйган 4 нафар тиббиёт ходимига 4-сон ШКШ маъмурияти томонидан ҳайфсан интизомий жазо чораси қўлланган.
Изоҳ (0)