O‘zbekistonning BMT Oziq-ovqat va qishloq xo‘jaligi tashkiloti (FAO, qarorgohi Rimda) huzuridagi doimiy vakili o‘rinbosari “Bir mamlakat — bir mahsulot” global tashabbusi bo‘yicha o‘tkazilgan yig‘ilishda ishtirok etdi, deb xabar bermoqda “Dunyo” axborot agentligi.
Qayd etilishicha, anjumanda FAO bosh direktori o‘rinbosari Bet Bekdol, tashkilotning mintaqaviy rahbarlari va ekspertlari, a’zo davlatlarning 120 dan ziyod vakillari ishtirok etgan. Tadbirda ushbu tashabbusning ahamiyati to‘g‘risida ishtirokchilarga axborot berilgan.
Ma’lum qilinishicha, bugungi kunda dunyoda iste’mol qilinayotgan oziq-ovqat mahsulotlarining 75 foizi atigi 12 turdagi an’anaviy qishloq xo‘jaligi ekinlari va 5 turdagi hayvonot hissasiga to‘g‘ri kelmoqda.
Ekspertlar tahlillariga ko‘ra, 2050-yilga kelib dunyo aholisining soni ko‘payishi natijasida oziq-ovqat ishlab chiqarish hajmini bugungi kunga nisbatan qo‘shimcha 50 foizdan ko‘proqqa oshirish kerak bo‘ladi. Bu, o‘z navbatida, mavjud ekin turlari va hayvonlarni yetishtirishda tabiatga va tabiiy resurslarga bo‘lgan bosimning yanada ortishiga sabab bo‘ladi.
Bugungi kunda qishloq xo‘jaligida “yashil innovatsiya”larni joriy etish barqaror rivojlanishning asosiy vazifalaridan biri hisoblanadi.
FAO “Bir mamlakat–bir mahsulot” global tashabbusi orqali qishloq xo‘jaligida istiqboli va salohiyati yuqori bo‘lgan muqobil ekin turlarini yetishtirish, qo‘shilgan qiymat zanjirini rivojlantirish, yangi bozorlarni kashf qilish, fermerlar daromadini oshirish hamda jamiyatda sog‘lom ovqatlanish tarzini targ‘ib etishni maqsad qilgan. Mazkur tashabbus global muammolar, jumladan, hosildorlikni oshirish, sog‘lom ovqatlanish, oziq-ovqat yo‘qotilishi va chiqindilari masalalari, bioxilma-xillik, yer va suv resurslari, kimyoviy moddalar ishlatilishi hamda iqlim o‘zgarishi muammolarini hal qilishga qaratilgan. Bugungi kunda FAOning ushbu tashabbusida ishtirok etishga dunyoning 30 dan ziyod davlati qiziqish bildirgan.
O‘zbekistonning FAO huzuridagi doimiy vakili o‘rinbosari o‘z ma’ruzasida so‘nggi 6 yilda mamlakat qishloq xo‘jaligidagi yuz berayotgan o‘zgarishlar va uning istiqboli to‘g‘risidagi ma’lumotlarni o‘rtoqlashgan. Bugungi kunda qishloq xo‘jaligida ekinlarni diversifikatsiya qilish, resursga tejamli bo‘lgan texnologiyalarni keng joriy etish, intensiv bog‘lar maydonini kengaytirish, yuqori qiymatga ega mahsulotlar ishlab chiqarish va eksport hajmini oshirish asosiy vazifalardan ekani qayd etilgan.
Boston Consulting Group konsalting kompaniyasi tomonidan o‘tkazilgan tahlil natijalariga ko‘ra, O‘zbekiston meva yetishtirish va uni jahon bozoriga yetkazib berish bo‘yicha sezilarli darajada raqobat ustunligiga ega bo‘lib, ushbu tarmoqning 2030-yilga qadar bo‘lgan eksport salohiyati 3,8 milliard dollar deb baholangan.
O‘zbekistonda gilos yetishtirishni rivojlantirish, uning qo‘shilgan qiymat zanjirini takomillashtirish ichki va tashqi bozorlarda yuqori istiqbolga ega ekani ta’kidlangan.
O‘zbekiston tomoni FAOning “Bir mamlakat — bir mahsulot” global tashabbusini qo‘llab-quvvatlash va unda ishtirok etishga tayyor ekanini ma’lum qilgan.
Izoh (0)