Ijtimoiy tarmoqlarda Namangan viloyatining Chortoq tumanida joylashgan tug‘uruqxonadagi tiqilinch holat tasvirlangan video tarqaldi. “Daryo” muxbiri Azizbek Abduvaliyev bu yerda bo‘lib, vaziyatni o‘rgandi.
Chortoq tuman tibbiyot birlashmasi tug‘uruqxona bo‘limi mudiri Hamida Obidovaning aytishicha, bo‘limda 50 ta o‘rin mavjud. Video tarqalgan kuni esa tug‘ish jarayonidagi ayollar soni 90 nafardan oshiq bo‘lgan. Ayni paytda esa ularning soni 72 nafar, ya’ni baribir qo‘shimcha 22 ta o‘ringa ehtiyoj bor.
“To‘lg‘oq tutgan ayollar soni qachon ko‘payib, qachon kamayishini taxmin qilish imkonsiz narsa. Ba’zan palatalarimizda koykalar bo‘shab qolgan kunlar ham bo‘ladi. Oldinlari, aniqrog‘i, o‘tgan asrning 80-90-yillarida Chortoq tumanida tug‘ish yoshidagi ayollar soni o‘racha 25 ming nafar, tug‘uruqxonadagi o‘rinlarimiz soni esa 160 ta bo‘lgan. Hozir tug‘ish yoshidagi ayollar soni 55 mingga yetdi, koykalarimiz esa qisqartirilib, 50 taga tushib qoldi. Shu sababli bunday mushkul vaziyatga duch kelyapmiz”, — deydi Hamida Obidova.
Chindan ham g‘alati paradoks: tumanda tug‘ish yoshidagi ayollar soni ikki baravar oshgan, koykalar soni esa uch baravar qisqargan. Shu sababli uch kishiga mo‘ljallangan palatalarda 4-5 kishi yotishga majbur bo‘lmoqda, bo‘lim yo‘laklarida esa qo‘shimcha karavotlar shay etib qo‘yilgan.
Tumanning chekka Peshqo‘rg‘on va Hazratisho qishloqlarida ham mahalliy tug‘uruqxonalar bor, lekin murakkab holatlarda va tungi payt homilador ayollar baribir shu bo‘limga olib kelinadi. Mavjud vaziyatdan chiqish uchun tuman tibbiyot birlashmasi ginekologiya bo‘limida qo‘shimcha o‘rinlar ajratildi, hatto tug‘uruqxona mudirasi va shifokorlar xonalarida ham homilador ayollar uchun joylar tayyorlandi, biroq bu muammoning yechimi emasligini tibbiyot xodimlarining o‘zi ham tan olmoqda.
Yana bir muammo shifokorlar yetishmasligi bilan bog‘liq. Bo‘limda hozir 4 nafar shifokor — ikki nafar ginekolog va ikki nafar neonatolog ishlamoqda. Aslida esa 10 nafar bemorga hech yo‘q bir shifokor to‘g‘ri kelishi kerak.
Hamida Obidovaning aytishicha, shunday murakkab vaziyat bo‘lishiga qaramay, bo‘limda chaqaloqlar va ularning onalari bilan bog‘liq noxush holatlar yaqin orada kuzatilmagan. Biroq bu yerda farzandini dunyoga keltirayotgan ayollar va ularning yaqinlari mavjud holatdan mamnun emasligi aniq.
Biz video tasvirga olingan o‘sha “mashhur” xonada ham bo‘ldik. Akusher-ginekolog Mahmuda Bo‘ronovaning ta’kidlashicha, o‘sha kuni bo‘limda tug‘gan ayollar ko‘payib, bu yerga 13 nafar ayol va ularning chaqaloqlari joylashtirilgan.
Endi esa qo‘shimcha o‘rinlar yaratilgani tufayli bu muammo biroz ortga chekinib, palatada asli qoidalarda talab etilganidek 5 ta koyka hozirlanganini ko‘rish mumkin.
Namangan viloyat sog‘liqni saqlash boshqarmasi mutasaddilarining “Daryo”ga ma’lum qilishicha, shu yilning o‘tgan 9 oyida 50 o‘rinli tuman tug‘uruq bo‘limida 3700 nafardan ortiq homilador ayol farzandli bo‘lgan. Muassasada joriy yil sentabr oyiga qadar kuniga o‘rtacha 13 ta tug‘uruq amalga oshirilgan bo‘lib, bu vaqt oralig‘ida shifoxonaning ortiqcha yuklama bilan ishlashi deyarli kuzatilmagan. Biroq sentyabr oyida kunlik tug‘ilishlar soni o‘rtacha 20 taga ortib ketgani bois, shifoxonada o‘rin-joy yetishmasligi yuzaga kelgan.
“Olib borilgan o‘rganishlar natijasida yuqoridagi muammoni tezkor bartaraf etish choralari ko‘rildi. Ya’ni tibbiyot birlashmasidagi samarasiz ishlayotgan statsionar o‘rinlar hisobidan tug‘uruq bo‘limi uchun qo‘shimcha yana 20 ta, jami 70 ta o‘rin-joy ajratildi. Ayni paytda muassasada homilador ayollarga sanitar-epidemiologik talablarga to‘la javob beradigan sharoitda sifatli tibbiy xizmat ko‘rsatilmoqda”, — deyiladi boshqarma tomonidan bildirilgan munosabatda.
Biz bu sharoitlarni bordik, ko‘rdik va o‘rgandik. Nazarimizda, ularni “talablarga to‘la javob beradigan holatga keltirildi” deyishga hali ancha erta. Chortoqda homilador ayollar uchun qo‘shimcha o‘rinlar zarur va ular tez orada yaratilishi kerak. Aks holda ijtimoiy tarmoqlarda tarqalgan tasvirlar birinchisi ham, oxirgisi ham bo‘lmasligi tayin.
Izoh (0)