Ўзбекистоннинг БМТ Озиқ-овқат ва қишлоқ хўжалиги ташкилоти (FAO, қароргоҳи Римда) ҳузуридаги доимий вакили ўринбосари «Бир мамлакат — бир маҳсулот» глобал ташаббуси бўйича ўтказилган йиғилишда иштирок этди, деб хабар бермоқда «Дунё» ахборот агентлиги.
Қайд этилишича, анжуманда FAO бош директори ўринбосари Бет Бекдол, ташкилотнинг минтақавий раҳбарлари ва экспертлари, аъзо давлатларнинг 120 дан зиёд вакиллари иштирок этган. Тадбирда ушбу ташаббуснинг аҳамияти тўғрисида иштирокчиларга ахборот берилган.
Маълум қилинишича, бугунги кунда дунёда истеъмол қилинаётган озиқ-овқат маҳсулотларининг 75 фоизи атиги 12 турдаги анъанавий қишлоқ хўжалиги экинлари ва 5 турдаги ҳайвонот ҳиссасига тўғри келмоқда.
Экспертлар таҳлилларига кўра, 2050 йилга келиб дунё аҳолисининг сони кўпайиши натижасида озиқ-овқат ишлаб чиқариш ҳажмини бугунги кунга нисбатан қўшимча 50 фоиздан кўпроққа ошириш керак бўлади. Бу, ўз навбатида, мавжуд экин турлари ва ҳайвонларни етиштиришда табиатга ва табиий ресурсларга бўлган босимнинг янада ортишига сабаб бўлади.
Бугунги кунда қишлоқ хўжалигида «яшил инновация»ларни жорий этиш барқарор ривожланишнинг асосий вазифаларидан бири ҳисобланади.
FAO «Бир мамлакат–бир маҳсулот» глобал ташаббуси орқали қишлоқ хўжалигида истиқболи ва салоҳияти юқори бўлган муқобил экин турларини етиштириш, қўшилган қиймат занжирини ривожлантириш, янги бозорларни кашф қилиш, фермерлар даромадини ошириш ҳамда жамиятда соғлом овқатланиш тарзини тарғиб этишни мақсад қилган. Мазкур ташаббус глобал муаммолар, жумладан, ҳосилдорликни ошириш, соғлом овқатланиш, озиқ-овқат йўқотилиши ва чиқиндилари масалалари, биохилма-хиллик, ер ва сув ресурслари, кимёвий моддалар ишлатилиши ҳамда иқлим ўзгариши муаммоларини ҳал қилишга қаратилган. Бугунги кунда FAOнинг ушбу ташаббусида иштирок этишга дунёнинг 30 дан зиёд давлати қизиқиш билдирган.
Ўзбекистоннинг FAO ҳузуридаги доимий вакили ўринбосари ўз маърузасида сўнгги 6 йилда мамлакат қишлоқ хўжалигидаги юз бераётган ўзгаришлар ва унинг истиқболи тўғрисидаги маълумотларни ўртоқлашган. Бугунги кунда қишлоқ хўжалигида экинларни диверсификация қилиш, ресурсга тежамли бўлган технологияларни кенг жорий этиш, интенсив боғлар майдонини кенгайтириш, юқори қийматга эга маҳсулотлар ишлаб чиқариш ва экспорт ҳажмини ошириш асосий вазифалардан экани қайд этилган.
Boston Consulting Group консалтинг компанияси томонидан ўтказилган таҳлил натижаларига кўра, Ўзбекистон мева етиштириш ва уни жаҳон бозорига етказиб бериш бўйича сезиларли даражада рақобат устунлигига эга бўлиб, ушбу тармоқнинг 2030 йилга қадар бўлган экспорт салоҳияти 3,8 миллиард доллар деб баҳоланган.
Ўзбекистонда гилос етиштиришни ривожлантириш, унинг қўшилган қиймат занжирини такомиллаштириш ички ва ташқи бозорларда юқори истиқболга эга экани таъкидланган.
Ўзбекистон томони FAOнинг «Бир мамлакат — бир маҳсулот» глобал ташаббусини қўллаб-қувватлаш ва унда иштирок этишга тайёр эканини маълум қилган.
Изоҳ (0)