O‘zbekistonlik migrantlarning aksarida bizni Rossiya boqyapti, degan noto‘g‘ri tushuncha bor. Bu haqda huquq faoli Botirjon Shermuhammad “AzonTV” loyihasiga bergan intervyusida aytib o‘tgan.
Botir Shermuhammadning ta’kidlashicha, Rossiya va Ukraina o‘rtasidagi urushga migrantlarni, xususan, o‘zbek muhojirlarini jalb qilayotgan targ‘ibotchilar migrantlarni Rossiya boqayotgani, shu bois ular ushbu mamlakat oldida qarzdor ekaniga ko‘proq urg‘u berishmoqda.
“Ushbu masalada migrantlar fikrini bilish maqsadida kichik so‘rovnoma o‘tkazdik. Shunday mazmundaki, “Nima deb o‘ylaysiz, Rossiyadagi mehnat muhojirlariga halol mehnat qilib pul topishlari uchun sharoit yaratilyapti. Shunday imkon yaratilgani uchun Ukrainaga borib, Rossiya tarafidan urushga qatnashish kerakmi?” degan savol berilgan. Ishtirokchilarning 6 foizi “ha” deb javobni bergan. Qolgan 94 foizi esa “yo‘q” degan javobni ko‘rsatgan” — degan huquqshunos.
Uning qo‘shimcha qilishicha, ijtimoiy tarmoqlarda bizni Rossiya hukumati boqyapti, degan noto‘g‘ri tushunchani targ‘ib qilayotganlar bor.
“Ko‘p aytamiz, hech kimni hech kim boqmaydi! Har bitta mehnat muhojiri qayerga borishdan qat’i nazar, Rossiyagami, boshqa yergami, o‘zining halol mehnati bilan natijasini oladi. Hech kim bekordan-bekor pul bermaydi. Soliq to‘layapti, ishini ham qilyapti, o‘sha davlatning qonunchilik doirasida ishlayapti. Bu kabi fikrlarni to‘g‘irlab olish kerak”, — degan Botirjon Shermuhammad.
Avvalroq huquq faoli Botirjon Shermuhammad urushga yollanganlik uchun O‘zbekistonda, Ukrainada va hatto Rossiyada ham jinoiy javobgarlik belgilangani haqida aytib o‘tgangandi.
Izoh (0)