29-sentabr kuni O‘zbekiston hukumati va BMT Qochqinlar bo‘yicha Oliy komissari boshqarmasi tomonidan Pokistonda sodir bo‘lgan halokatli suv toshqinidan jabrlanganlarga taqdim etilgan insonparvarlik yordami yuklangan samolyot Termizdan Karachiga uchib ketdi, deb xabar qilmoqda “Dunyo” AA.
Qayd etilishicha, bu birinchi qo‘shma insonparvarlik yordami bo‘lib, yuklar O‘zbekiston Mudofaa vazirligi tomonidan taqdim etilgan samolyotlarda yetkazib beriladi. Insonparvarlik ko‘magi tarkibi suv toshqinlari oqibatida o‘z boshpanalaridan ayrilganlar uchun 15 tonnadan ortiq hajmdagi vaqtincha yashash uchun mo‘ljallangan turar joy modullaridan iborat.
Surxondaryo viloyati hokimligi matbuot xizmatining ma’lum qilishicha, insonparvarlik yordami yuklari dastavval BMT Qochoqlar bo‘yicha Oliy komissarining Surxondaryo viloyatidagi Mintaqaviy gumanitar-logistik markaziga keltirildi.
2022-yilning iyunida prezidenti tomonidan Termez Cargo Centre majmuasiga Gumanitar yordam ko‘rsatish bo‘yicha xalqaro ko‘p funksiyali transport-logistika xabi maqomi berilgandi.
BMTning Qochoqlar bo‘yicha Oliy komissari boshqarmasi Pokistondagi suv toshqinlaridan eng ko‘p zarar ko‘rgan hududlardagi mahalliy hokimliklarga shu kungacha 1 milliondan ortiq birlamchi zaruriy buyumlarni topshirdi.
“Biz O‘zbekiston Hukumatining qo‘llab-quvvatlovi orqali BMTning Qochoqlar bo‘yicha Oliy komissari boshqarmasi favqulodda vaziyatlarda tezkor gumanitar yordam ko‘rsatish imkoniga ega bo‘layotganini yuksak baholaymiz”, — deya e’tirof etgan BMT QOKBning Markaziy Osiyo bo‘yicha vakili Xans Fridrix Shodder.
So‘nggi ma’lumotlarga qaraganda, suv toshqinlari natijasida Pokistonning 7,6 millionga yaqin aholisi o‘zi istiqomat qiladigan hududlardan ko‘chirilgan, shundan deyarli 600 ming nafari ijtimoiy ko‘mak beriladigan boshpanalarda yashayapti. Mamlakat rasmiylari eng ko‘p talofat ko‘rgan tumanlarda toshqin suvlarining chekinishi olti oygacha davom etishi mumkinligidan ogohlantirmoqda.
1-sentabr kuni Islomobod xalqaro aeroportiga O‘zbekiston harbiy-havo kuchlarining Il-76 samolyoti kelib qo‘ndi. Unga Prezident Shavkat Mirziyoyev topshirig‘iga binoan, Pokiston mintaqalarida ro‘y bergan suv toshqinidan jabrlanganlar uchun yo‘llangan 40 tonnadan ortiq hajmdagi insonparvarlik yordami yuklangan edi. Aeroportda yuklarni Pokiston ilm-fan va texnologiyalar bo‘yicha federal vaziri Aga Xasan Baloch qabul qilib oldi.
Izoh (0)