“Yaqin qarindoshlar o‘rtasidagi nikoh go‘daklar o‘limiga ko‘proq sabab bo‘lmoqda” – Senat raisi

O‘zbekistonda 2021-yilda go‘daklar o‘limi soni 7 ming 214 tani tashkil etib, 2020-yilga nisbatan 160 taga oshgan. Bu haqda 28-sentabr kuni o‘tkazilgan Oliy Majlis Senati kengashi yig‘ilishida ma’lum qilindi, deya xabar bermoqda “Daryo” muxbiri.

Yig‘ilishda reproduktiv salomatlikni saqlash, onalik va bolalikni muhofaza qilish masalalari muhokama qilindi. Senat raisi Tanzila Norboyeva tizimdagi asosiy muammolarga to‘xtalib o‘tdi.

Reproduktiv salomatlikni saqlash, onalik va bolalikni muhofaza qilish ishlari hamisha dolzarb muammo hisoblanadi. Ayollar va bolalarga malakali, ixtisoslashtirilgan yuqori texnologik tibbiy yordam ko‘rsatish borasida qilinayotgan ijobiy ishlar bilan birgalikda, sohada ko‘pgina kamchiliklar ham kuzatilmoqda. Jumladan, 2021-yilda go‘daklar o‘limi 7 ming 214 tani tashkil etgan bo‘lib, 2020-yilga nisbatan 160 taga oshgan.

Albatta, faqat tanqid qilish emas, sohadagi muammolar salbiy oqibatlarini ular kelib chiqqanidan avval bartaraf etish yuzasidan yechimlar berish zarur. Reproduktiv salomatlik darajasiga jiddiy ta’sir ko‘rsatuvchi omil – yaqin qarindoshlar o‘rtasidagi nikoh borasida fuqarolarimizga taqiqlar qo‘yish bilan hech narsaga erishmaymiz. Aksincha, insonlarning shaxsiy hayot erkinligi doirasiga daxl qilib qo‘yamiz. Shu sababli yaqin qarindoshlar o‘rtasidagi nikohlarning salbiy oqibatlari borasida aholimiz o‘rtasida tushuntirish, tashviqot ishlarini kuchaytirish zarur.

Aslida reproduktiv salomatlik masalasidagi muammolarni hal etishda insonni kamol topishi, ta’lim olishi jarayonida ishtirok etuvchi barcha muttasadi idoralar — Maktabgacha ta’lim va Xalq ta’limi vazirliklari faol bo‘lishi shart. Aynan maktabdan boshlab salomatlik darslari yo‘lga qo‘yilishi, uning doirasida esa gigiyena, reproduktiv salomatlik va farzandalarimizning kelajak turmushida muhim bo‘lgan boshqa masalalar o‘qitilishi zarur.

Tanzila Norboyeva, Senat raisi.

Shuningdek, homilador, tug‘uvchi, tuqqan ayollar va yangi tug‘ilgan chaqaloqlarga ko‘rsatiladigan tibbiy yordam sifatini yaxshilash maqsadida respublikadagi tug‘ruqqa yordam beruvchi muassasalarning moddiy-texnika bazasini xalqaro standartlarga muvofiq mustahkamlash va zarur dori vositalari bilan ta’minlash masalasi to‘liq bajarilmagani ta’kidlandi.