Ўзбекистонлик мигрантларнинг аксарида бизни Россия боқяпти, деган нотўғри тушунча бор. Бу ҳақда ҳуқуқ фаоли Ботиржон Шермуҳаммад «АзонТВ» лойиҳасига берган интервьюсида айтиб ўтган.
Ботир Шермуҳаммаднинг таъкидлашича, Россия ва Украина ўртасидаги урушга мигрантларни, хусусан, ўзбек муҳожирларини жалб қилаётган тарғиботчилар мигрантларни Россия боқаётгани, шу боис улар ушбу мамлакат олдида қарздор эканига кўпроқ урғу беришмоқда.
«Ушбу масалада мигрантлар фикрини билиш мақсадида кичик сўровнома ўтказдик. Шундай мазмундаки, «Нима деб ўйлайсиз, Россиядаги меҳнат муҳожирларига ҳалол меҳнат қилиб пул топишлари учун шароит яратиляпти. Шундай имкон яратилгани учун Украинага бориб, Россия тарафидан урушга қатнашиш керакми?» деган савол берилган. Иштирокчиларнинг 6 фоизи «ҳа» деб жавобни берган. Қолган 94 фоизи эса «йўқ» деган жавобни кўрсатган» — деган ҳуқуқшунос.
Унинг қўшимча қилишича, ижтимоий тармоқларда бизни Россия ҳукумати боқяпти, деган нотўғри тушунчани тарғиб қилаётганлар бор.
«Кўп айтамиз, ҳеч кимни ҳеч ким боқмайди! Ҳар битта меҳнат муҳожири қаерга боришдан қатъи назар, Россиягами, бошқа ергами, ўзининг ҳалол меҳнати билан натижасини олади. Ҳеч ким бекордан-бекор пул бермайди. Солиқ тўлаяпти, ишини ҳам қиляпти, ўша давлатнинг қонунчилик доирасида ишлаяпти. Бу каби фикрларни тўғирлаб олиш керак», — деган Ботиржон Шермуҳаммад.
Аввалроқ ҳуқуқ фаоли Ботиржон Шермуҳаммад урушга ёлланганлик учун Ўзбекистонда, Украинада ва ҳатто Россияда ҳам жиноий жавобгарлик белгилангани ҳақида айтиб ўтганганди.
Изоҳ (0)