Россияликлар битта жойга 25 минг доллар тўлаб, хусусий самолётларда сафарбарликдан қочмоқда

Россияда сафарбарлик эълон қилинганидан кейин хусусий самолётларда парвозларга бўлган талаб кескин ошиб кетди. Британиянинг The Guardian нашри маълумотларига кўра, бундай парвозларнинг асосий йўналишлари Арманистон, Туркия ва Озарбайжон ҳисобланади, ушбу мамлакатларга россияликлар визасиз кириши мумкин.

Your Charter компанияси директори Евгений Биков журналистларга маълум қилишича, сафарбарлик эълон қилингач, парвозлар учун талабномалар сони кўп марта ошиб кетган. «Одатда биз кунига 50 тадан талабнома олган бўлсак, энди эса беш мингтага етди. Вазиятни мутлақо ақлга сиғдириб бўлмайди», — деди у.

Биковнинг қўшимча қилишича, унинг компанияси талабни қондириш ва нархларни пасайтириш учун каттароқ сиғимли самолётлардан фойдаланишни бошлаган, бироқ бу ҳам етарли бўлмаяпти. «Биз ҳамма учун жой топиб беролмаяпмиз», — деди Биков.

The Guardian ёзишича, ҳозир хусусий самолётдаги битта жой нархи 1,3—1,5 миллион рубль (22—25 минг доллар)га, саккиз ўринли самолёт ижараси эса 5—9 миллион рубль (85—150 минг доллар)га тенг.

Хусусий парвозларга ихтисослашган FlightWay компанияси раҳбари Эдуард Симонов The Guardian’га маълум қилишича, Арманистон, Туркия, Қозоғистон ва Дубайга парвозларга талаб «50 карра ўсган». Шунингдек, унинг қайд этишича, Россияга нисбатан халқаро санкциялар жорий этилгач, самолётларни ижарага олиш қийинлашган. «Хусусий ташувлар билан шуғулланувчи Европа фирмаларининг барчаси бозордан кетди. Ҳозир таклифдан кўра талаб каттароқ, нархлар эса ярим йил аввалгига нисбатан анча ошиб кетган», — деди Симонов.

The Guardian ёзишича, тахминларга кўра, уруш бошланганидан кейин Россиядан мамлакатда яшовчи миллионерларнинг 15 фоизгача бўлган қисми кетиб қолган, сентябрда эълон қилинган сафарбарлик эса вазиятни янада чуқурлаштирган бўлиши мумкин. Ушбу тахминни Москвадаги консерж-сервислардан бирининг ходими тасдиқлади.

«Бизнинг ёш эркак мижозларимизнинг кўпчилиги ўтган ҳафта Путин сафарбарлик эълон қилганидан кейин кетиб қолди. Авваллари мен улар учун жой банд қилиш учун ресторан ва барларга қўнғироқ қилардим. Энди эса ишим улар учун Ереванга самолётда улар учун охирги жойни топиш мақсадида рейслар агрегаторларини кўриб чиқишдан иборат бўляпти», — деди у.

Аммо фақат бой россияликларгина мамлакатни хусусий самолётларда тарк этаётгани йўқ. «Коммерсантъ» ёзишича, Россия IT-компаниялари ўз ходимларини мамлакатдан эвакуация қилиш учун бутун бошли чартер рейсларни сотиб олмоқда. Газета аниқлик киритишича, ушбу саноат ишчиларининг оммавий чиқиб кетиши шу билан боғлиқки, уларнинг кўпчилиги сафарбарликдан ҳимояни кафолатловчи мутахассисликларга эга эмас.

The Guardian ёзишича, Давлат думасининг кўпинча Ғарбга қарши ва ватанпарварлик баёнотлари билан чиқиш қилувчи депутатининг ўғли шундай усул билан Россияни тарк этган. Газета маълумотларига кўра, депутат (исми айтилмаган) ўғлининг мамлакатдан қўйиб юборилганига ишонч ҳосил қилиш учун уни аэропортгача кузатиб қўйган. Депутатнинг ўғли Туркияга кетаётиб, йўлда Snapchat’даги ёпиқ гуруҳга «Буюк қочиш», — дея пост қолдирди.