UNICEF va “Zamin” xalqaro jamoat fondi hamkorligidagi “To‘siqlar” kompaniyasi O‘zbekistondagi ilk faoliyatini Buxorodan boshladi. Bu kompaniya hamjamiyatlarni inklyuziv bo‘lishga hamda nogironligi bo‘lgan bolalar (NBB)ga nisbatan diskriminatsiyaning har qanday ko‘rinishlariga chek qo‘yishga chorlaydi, deya xabar bermoqda “Daryo” muxbiri.
Buxoro shahrida bo‘lib o‘tgan “To‘siqlar” kompaniyasi taqdimotida jurnalist, bloger va matbuot xodimlari qatnashgan. Unda OAV qo‘llaydigan til, taqdimot usuli hamda matbuotdagi diskurs orqali inklyuziv hamjamiyatlarni shakllantirish, nogironligi bo‘lgan bolalarga nisbatan salbiy munosabat, diskriminatsiya amaliyoti va stereotiplardan voz kechish to‘g‘risida munozaralar olib borilgan.
“Bugun ushbu tarixiy shaharda ‘To‘siqlar’ kompaniyasi faoliyatiga start berildi. Buning o‘ziga xos jihati — Buxoroda nogironligi bo‘lgan bolalar integratsiyasini kengaytirish borasida amaliy ishlar bajarilgan. O‘tgan ikki yil ichida O‘zbekiston ham nogironligi bo‘lgan bolalar integratsiyasini kengaytirish borasida sezilarli darajada ilgariladi va ushbu maqsadga qaratilgan bir qator siyosiy qarorlarni qabul qildi”, — deydi UNICEF’ning O‘zbekistondagi vakolatxonasi rahbari Munir Mamadzade.
Munir Mamadzadening so‘ziga ko‘ra, bu borada O‘zbekiston bir qator muhim yutuqlarga erishgan. BMTning Nogironlar huquqlari to‘g‘risidagi Konvensiyasining ratifikatsiya qilinishi bunga misol bo‘la oladi. Ammo shunga qaramasdan, hali ancha ishlarni amalga oshirish lozim”, — dedi u.
Bildirilishicha, “To‘siqlar” kompaniyasi BHK va NHK tamoyillarini yoritishga qaratilgan. Ushbu tamoyillar bolalarni nogironligi asosida internat shaklidagi muassasalarga joylash (institutsionalizatsiya)ga barham berish va bolalar o‘z hamjamiyati, o‘z oilasida tarbiyalanishlarini ta’minlash, Segregatsiyaga asoslangan ta’lim tizimlaridan voz kechish, Jamiyatda xabardorlikni oshirish hamda Yordam xizmatlaridan foydalanish imkoniyatlarini kengaytirishni targ‘ib qilishdan iborat.
Taqdimotni olib borgan UNICEF kommunikatsiya seksiyasi rahbari Sitsi Singizi nogironligi bo‘lgan bolalarning qay darajada ilm olishi, jamiyatda ishtirok etishi va hayot tarzi inklyuziyaga bog‘liq ekanini bildirgan.
“Dunyo aholisining o‘n besh foizi — kamida bir milliard odam tug‘ma yoxud orttirilgan nogironlikning biror shakliga ega. Ularning 240 millioniga yaqini bolalardir. Nogironligi bo‘lgan bolalar har bir jamiyatdagi eng zaif ahvoldagi odamlar qatoriga kiradi. Bir qator to‘siqlar borki, bu ularni kundalik hayotda yashash, ijtimoiy xizmatlardan foydalanish va o‘z hamjamiyatlarida ishtirok etish qobiliyatini cheklaydi. Ommaviy axborot vositalari xodimlari esa bu to‘siqlarni olib tashlashda ‘tez yordam’ vazifasini bajara oladi”, — dedi Sitsi Singizi.
Taqdimotda ma’lum qilinishicha, O‘zbekistonda nogironligi bo‘lgan bolalar internat shaklidagi muassasalarda ta’lim olayotgan nogiron bolalarning 75 foizini tashkil qiladi. Ayni vaqtda, 9700 ga yaqin nogironligi bo‘lgan bolalar maktabga bormaydi.
“O‘zbekistonda so‘nggi paytlarda Mehribonlik uylarida yashovchi bolalarni oilaviy muhitga joylashtirish bo‘yicha faol chora-tadbirlar amalga oshirilayotganini va yangi o‘quv yilida 225 ta maktab nogironligi bo‘lgan bolalar uchun o‘z eshiklarini ochganini kuzatdik. Biroq, ota-onalar, mahallalar, fuqarolik jamiyati va davlat idoralarini birlashtirib, barcha nogiron bolalarning barcha huquqlarini bosqichma-bosqich ro‘yobga chiqarish, stereotiplarga, noto‘g‘ri qarashlarga qarshi zudlik bilan kurashish va nogironligi bo‘lgan bolalarga nisbatan kamsitishlarga barham berish uchun hali ko‘p ishlar qilinishi kerak”, — dedi Munir Mamadzade.
Izoh (0)