Qashqadaryo viloyati sudi raisi Abduqayum Mahkamov 2016-yilga qadar bo‘lgan muddat davomida sudyalar faoliyatiga aralashuv, ularning fikrini o‘zgartirishga urinish va bosim bo‘lganini tan oldi. Bu haqda Qarshi shahridagi Jurnalistlar uyida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Qayd etilishicha, Qarshi shahridagi Jurnalistlar uyida viloyat sudi raisi va uning o‘rinbosarlari ishtirokida matbuot anjumani tashkil etilgan. Matbuot anjumanida so‘z olgan “Daryo” muxbiri sud raisi va o‘rinbosarlariga yuzlanib, sudyalar faoliyati davomida ularning qarorlarini o‘zgartirishga urinish (xoh u iltimos tarzida, xoh bosim yoki boshqa usullarda) bo‘lgan-bo‘lmagani bilan qiziqdi.
“Ilgari — 2016-yilgacha bo‘lgan. O‘zi sud jarayoni manfaatlar to‘qnashuvidan iborat. 2014-, 2015- yoki 2016-yillargacha bo‘lgan davrni eslang, birorta oqlov hukmini uchratasizmi? Yo‘q, albatta. Shuning uchun ish davomida bunaqa aralashuvlar bo‘lgan. Ammo 2016-yildan so‘ng, aynan amaldagi Shavkat Mirziyoyevning hokimiyat tepasiga kelishi va sudyalar daxlsizligini kuchaytirish, ularning mustaqilligini ta’minlashga bo‘lgan e’tibor sabab ayni kunda umuman aralashuv yo‘q”, — dedi viloyat sudi raisi Abduqayum Mahkamov.
Viloyat sudi raisi o‘rinbosarlarining barchasi — jinoyat ishlari bo‘yicha sudlov hay’ati raisi O‘tkir Mamadaliyev, fuqarolik ishlari bo‘yicha sudlov hay’ati raisi Ergash Umirov, iqtisodiy ishlar bo‘yicha sudlov hay’ati raisi Mo‘min Ostonov hamda viloyat Ma’muriy sudi raisi Xolis Muhammedovlar faoliyati davomida umuman bosim yoki qarorini o‘zgartirishga urinishlar bo‘lmaganini bildirdi.
Abduqayum Mahkamov, shuningdek, G‘uzor tumanining sobiq hokimi Sa’dulla Boboqulov hamda G‘uzor tumanlararo sudi raisi Sattor Aqanov o‘rtasidagi tortishuvni ham esga olib, mazkur voqeada ham sudyaga hokim tomonidan bosim o‘tkazishga urinish borligini eslatdi.
“O‘sha muloqotda hokimning so‘ziga e’tibor berganmisiz? O‘zini tanishtirishda men Xalq deputatlari tuman kengashi raisiman, deydi. Holbuki, hokim sudyaning har yil yakunida kengashga hisobot berishiga urg‘u berib, o‘zini hokim sifatida emas, kengash raisi sifatida tanishtiradi. Ammo o‘sha muloqotda sudyaning ham aybi bor. Bu haqda men o‘sha payt sudya Aqanov bilan gaplashib, o‘ziga ham aytganman. Sudya har qanday vaziyatda og‘ir, bosiq va muomala madaniyatiga rioya qilishi kerak. Suhbatdoshiga kechirib qo‘yasiz, deya qo‘pol muomalada bo‘lish sudga yarashmaydi”, — dedi Abduqayum Mahkamov.
Eslatib o‘tamiz, Abduqayum Mahkamov avvalroq “Daryo” muxbirining jurnalist va blogerlarning ochiq sud majlislarida qatnashishiga sudyalar tomonidan to‘siq qo‘yilayotgani va buning sababi haqidagi savoliga “Jurnalist va blogerlar sudga kelganda chaqirilgan tomon manfaatini himoya qiladi-da”, deya javob bergandi.