Janubiy Koreyada o‘z joniga qasd qilish darajasi o‘tgan bir yil ichida keskin o‘sib, rivojlangan mamlakatlar orasida eng yuqori bo‘lib qolmoqda va pandemiya oqibatlari davom etayotganidan darak bermoqda. Bu haqda Bloomberg xabar berdi.
Milliy statistika boshqarmasi 27-sentabr kuni taqdim etgan ma’lumotlarga ko‘ra, bir yil ichida qariyb 13 300 nafar koreyalik o‘z joniga qasd qilgan — bu har 100 ming kishidan 26 nafari demakdir. Ta’kidlash joiz, 2020-yilda ushbu ko‘rsatkich 25,7 ga teng edi.
Yaqinda esa Janubiy Koreya eng past tug‘ilish darajasi bo‘yicha o‘z rekordini yangilagani haqida xabar berilgandi. Siyosatchilar Osiyodagi eng muvaffaqiyatli iqtisodiyotlardan birining asosida yotgan ijtimoiy muammolarni oldingi qatorga olib chiqib, ushbu masalalarni yechishga urindi.
Koreya Moliya instituti tadqiqotchisi Son Min Kining aytishicha, o‘z joniga qasd qilish holatlari, odatda, iqtisodiyot yaxshi natija ko‘rsatmagan paytda ko‘payadi. O‘tgan yili iqtisodiyot pandemiya davridagi pastlashlardan keyin tiklanib olgan bo‘lsa-da, endi ishsizlik darajasi 1999-yildan buyon eng yuqori ko‘rsatkichga yetdi.
Bu yil iqtisodiy pasayish borasidagi xavotirlar o‘sib bormoqda, inflyatsiyani tiyib turish uchun foiz stavkalari esa ko‘tarilmoqda, natijada uy xo‘jaliklari va korxonalar moliyalariga tobora ko‘proq og‘irlik tushmoqda.
Koreyada o‘z joniga qasd qilish darajasining yuqoriligiga sabab bo‘luvchi yana boshqa omillar ham bo‘lib, ular maktab va ishxonadagi bosim, depressiya tufayli yordam so‘rab murojaat qilganlik uchun uyat hissi va keksa kishilarga nisbatan ijtimoiy himoyaning yo‘qligini o‘z ichiga oladi, deydi ekspertlar.
Izoh (0)