«Билайн Қозоғистон» компанияси 5 октябрдан республикада ўзининг «ТВ Интернет Дома» платформасида ва БееТВ сервисида баъзи Россия телеканаллари трансляциясини тўхтатади. Бу ҳақда оператор сайтидаги хабарда айтилади.
«Россия 24», «Первий канал СНГ», «Дом кино», «Победа», «О!» ва бошқа бир қатор каналлар узатилишдан тўхтайди.
Бунинг эвазига, оператор мижозларни қўшимча тўловсиз «кенгайтирилган ТВ-пакетларга ўтказишга ваъда берди.
«Билайн» Қозоғистонда энг йирик телевизион хизматлар кўрсатувчиларидан биридир.
Баъзи Telegram-каналлар хабарларига кўра, яқин келажакда бошқа операторлар ҳам Россия телевизион контентидан воз кечиши кутилмоқда. Бунинг сабаби очиқлангани йўқ.
Қайси давлатлар Россия телеканаллари эфирини тўхтатди?
Россиянинг Украинадаги ҳарбий ҳаракатлари оқибатида бир қатор давлатлар Россия телеканаллари эфирини тўхтатди ва Россия ОАВларини блоклашни бошлади. Хусусан, RT (Russia Today) канали намойишини Польша, Финляндия ва Австралия тақиқлади. Латвияда эса бир қанча Россия телеканаллари трансляцияси тўхтатилди. Молдова Спутник ахборот агентлиги сайтини блоклади.
YouTube эса Украина томони мурожаатига кўра, Украинада «Первий канал», «Звезда», ТНТ ва бошқа телеканаллар намойишини блоклади. Бундан ташқари, Европада RT ва Спутник саҳифалари ҳам блокланди.
Литвада 25 февраль куни «НТВ Мир», «RTР Планета», «Россия 24», шунингдек, «Беларусь 24» телеканалларини 5 йил муддатга, «РБК» ва ТВCИ эфирини эса 3 йил муддатга тақиқлаш бўйича қарор қабул қилинди.
Ушбу санадан Эстонияда ҳам Россиянинг бешта телеканали: «RTР Планета», «НТВ Мир», «НТВ Мир Балтия», «Россия 24» ва ТВCИ, шунингдек, «Беларусь 24»ни ретрансляциясига қўйилган тақиқ кучга кирди.
Италиянинг эфирга узатувчи Sky Italia компанияси (эгаси News Corp.) «Россия 24», «RTР Планета», «Первий канал» ва RT’ни автоматик эфир сеткасидан чиқариб юборди.
Қозоғистоннинг Қарағанда вилояти ҳудудий телекоммуникация компанияси ҳисобланмиш «Ремстройсервис» Россия федерал телеканаллари эфирини ўчириб қўйди.
Украинанинг Тошкентдаги элчихонаси 1 март куни Ўзбекистон Ташқи ишлар вазирлигига мамлакатда Россия телеканаллари эфирини тўхтатишни сўраб, нота юборганди.
Май ойида Қирғизистон ва Туркманистонда санкциялар туфайли Россия телеканаллари трансляцияси тўхтатилган эди. Узатиш тўхтатиб қўйилиши сабаби сифатида «қатор мамлакатларда умумроссия телеканаллари тарқатилиши бўйича қонуний чекловлар» қабул қилиниши туфайли уларни узатиш «халқаро сунъий йўлдошларда бир томонлама тартибда блоклаб қўйилгани» айтилганди.
ВГТРК (Умумроссия давлат телевизион ва радиоузатув компанияси)га қарши санкцияларни май ойи бошида Буюк Британия эълон қилган эди. Нафақат давлат медиахолдингининг ўзи, балки журналистлар ҳам чекловларга учради. Шундан кейин Россия ТИВ Британия элчисини чақириб, норозилик билдирди ва жавоб чоралари кўришга ваъда берди.
Уруш бошланганидан кейин, шунингдек, Евроиттифоқ, Австралия ва бошқа мамлакатлар ҳам уларга қарши санкциялар киритди. АҚШда Биринчи канал, «Россия-1» ва НТВ санкцияга учради. Санкциялар туфайли сунъий йўлдошлар эгалари бир томонлама тартибда ушбу телеканаллар узатилишини ўчириб қўя бошлади.
Изоҳ (0)