“Blogerlardan ensasi qotadigan aktrisalar nima ish qilib yurishibdi?” — Xonzoda Qambarova blogerlarni yoqtirmaydigan va o‘zi ham vayn olayotgan aktrisalar haqida (video)

“Daryo” nashrininng YouTube’dagi kanalida aktrisa va bloger Xonzoda Qambarova bilan suhbat uyushtirildi. U Instagram’ga joylanadigan reklama narxi va blogerlarni yoqtirmaydigan aktrisalar haqida o‘z fikrlarini bildirdi.

— Men bloger bo‘lishni niyat qilmaganman. Bolalikdan aktrisa yoki xonanda bo‘lishni orzu qilganman. Shaxsan men blogerlikni boshlagan paytim hatto bundan daromad topish mumkinligini ham bilmaganman. Yangi chiqayotgan blogerlar esa asosan pul topish uchun bu sohani egallashayapti.Ba’zi blogerlar reklama narxlarini nihoyatda oshirib yuborishgan. Ammo men bunday qilmaslikka harakat qilaman. Chunki Toshkentning yarmi qarindoshim bo‘lsa kerak. “Falonchi tanishingizning tanishiman”, desa bo‘ldi tushundim deyman. Hozirgi kunda Instagram’ga bitta postini 1000-2000 AQSH dollariga, bir sutka saqlanadigan storiyni esa 300-500 AQSH dollariga joylayman.“Buncha qimmat?” deyishingiz mumkin. Ammo reklamaning ham o‘ziga yarasha qiyinchiliklari bor. Mijozning talabi va beradigan puliga qarab reklama telefon yoki kamerada suratga olinadi. Ko‘chadagi eng arzon reklama roligi kamida 2000 AQSH dollariga suratga olinadi. Ammo u hech qayerda namoyish etilmaydi. Bloger esa reklamani olib, uni targ‘ibot ham qilib beradi. Ya’ni reklama beruvchi bitta o‘q bilan ikkita quyonni uradi, — deydi Xonzoda Qambarova.

Yodingizda bo‘lsa, blogerlarning “XIV Toshkent xalqaro kinofestivali”ning qizil yo‘lagidan o‘tishi ko‘plab tanqidlarga sabab bo‘lgandi. “Daryo” jurnalisti Nargizaxon Murodova suhbatdoshiga “Blogerlar bu yo‘lakdan o‘tishga qanchalik haqli?” degan savoliga quyidagicha javob oldi.

— Bu yil ham festivalga taklif etishdi, ammo borolmadim. Shu bois festival qanday o‘tganini bilmadim-u, ammo o‘tgan yili umuman yoqmagandi. “Faqatgina qizil yo‘lakdan o‘tish uchun yasanib kiyindimmi?” degandim. Chunki u umuman qiziqarli bo‘lmagandi. Aslida barcha blogerlar ham festivalga taklif etildi. Ular orasida tanish-bilishchilik qilib chiqayotganlari ham bor. Ammo bu gapim bilan blogerlar bu yerdan o‘tishga noloyiq demoqchi emasman. Xorijda blogerlar uchun maxsus festivallar ham o‘tkaziladi. Bizda blogerlarni ko‘rganda ensasini qotiradagan aktrisalarning o‘zi ham vaynlar suratga olib, internetga joylab yurishibdi. Nega endi qizil yo‘lakka kelganda blogerlarning bu yerdan o‘tishi mumkin emas? Blogerlar borgan tadbirini yoritadi va uni nafaqat O‘zbekistonda, xorijda ham kuzatishadi, — deydi bloger va aktrisa Xonzoda Qambarova.

Mavzuga doir:

• “Homilador holimda boshqa erkakka ko‘zimni suzishim kerak ekan” — aktrisa Xonzoda Qambarova “Aristokratlar” jamoasini tanlagani va 500 ming so‘m maosh olayotgani haqida (video)
• “ ‘Abu-saxiy’da do‘konma-do‘kon yurib, kosmetika sotardim” — Xonzoda mashhur bo‘lgunicha nima ish qilgani hamda instablogerlar odamlarni qanday aldashi haqida (video)
• “Qaynonamga san’atkor ekanim yoqmadi”. Bloger Xonzoda eri bilan yashamayotgani, bir oylik daromadi va seriallardagi rollarni sotib olishayotgani haqida