«Блогерлардан энсаси қотадиган актрисалар нима иш қилиб юришибди?» — Хонзода Қамбарова блогерларни ёқтирмайдиган ва ўзи ҳам вайн олаётган актрисалар ҳақида (видео)

«Дарё» нашрининнг YouTube’даги каналида актриса ва блогер Хонзода Қамбарова билан суҳбат уюштирилди. У Instagram’га жойланадиган реклама нархи ва блогерларни ёқтирмайдиган актрисалар ҳақида ўз фикрларини билдирди.

— Мен блогер бўлишни ният қилмаганман. Болаликдан актриса ёки хонанда бўлишни орзу қилганман. Шахсан мен блогерликни бошлаган пайтим ҳатто бундан даромад топиш мумкинлигини ҳам билмаганман. Янги чиқаётган блогерлар эса асосан пул топиш учун бу соҳани эгаллашаяпти.Баъзи блогерлар реклама нархларини ниҳоятда ошириб юборишган. Аммо мен бундай қилмасликка ҳаракат қиламан. Чунки Тошкентнинг ярми қариндошим бўлса керак. «Фалончи танишингизнинг танишиман», деса бўлди тушундим дейман. Ҳозирги кунда Instagram’га битта постини 1000-2000 АҚШ долларига, бир сутка сақланадиган сторийни эса 300-500 АҚШ долларига жойлайман.«Бунча қиммат?» дейишингиз мумкин. Аммо рекламанинг ҳам ўзига яраша қийинчиликлари бор. Мижознинг талаби ва берадиган пулига қараб реклама телефон ёки камерада суратга олинади. Кўчадаги энг арзон реклама ролиги камида 2000 АҚШ долларига суратга олинади. Аммо у ҳеч қаерда намойиш этилмайди. Блогер эса рекламани олиб, уни тарғибот ҳам қилиб беради. Яъни реклама берувчи битта ўқ билан иккита қуённи уради, — дейди Хонзода Қамбарова.

Ёдингизда бўлса, блогерларнинг «XIV Тошкент халқаро кинофестивали»нинг қизил йўлагидан ўтиши кўплаб танқидларга сабаб бўлганди. «Дарё» журналисти Наргизахон Муродова суҳбатдошига «Блогерлар бу йўлакдан ўтишга қанчалик ҳақли?» деган саволига қуйидагича жавоб олди.

— Бу йил ҳам фестивалга таклиф этишди, аммо боролмадим. Шу боис фестиваль қандай ўтганини билмадим-у, аммо ўтган йили умуман ёқмаганди. «Фақатгина қизил йўлакдан ўтиш учун ясаниб кийиндимми?» дегандим. Чунки у умуман қизиқарли бўлмаганди. Аслида барча блогерлар ҳам фестивалга таклиф этилди. Улар орасида таниш-билишчилик қилиб чиқаётганлари ҳам бор. Аммо бу гапим билан блогерлар бу ердан ўтишга нолойиқ демоқчи эмасман. Хорижда блогерлар учун махсус фестиваллар ҳам ўтказилади. Бизда блогерларни кўрганда энсасини қотирадаган актрисаларнинг ўзи ҳам вайнлар суратга олиб, интернетга жойлаб юришибди. Нега энди қизил йўлакка келганда блогерларнинг бу ердан ўтиши мумкин эмас? Блогерлар борган тадбирини ёритади ва уни нафақат Ўзбекистонда, хорижда ҳам кузатишади, — дейди блогер ва актриса Хонзода Қамбарова.

Мавзуга доир:

• «Ҳомиладор ҳолимда бошқа эркакка кўзимни сузишим керак экан» — актриса Хонзода Қамбарова «Аристократлар» жамоасини танлагани ва 500 минг сўм маош олаётгани ҳақида (видео)
• « ‘Абу-сахийъда дўконма-дўкон юриб, косметика сотардим» — Хонзода машҳур бўлгунича нима иш қилгани ҳамда инстаблогерлар одамларни қандай алдаши ҳақида (видео)
• «Қайнонамга санъаткор эканим ёқмади». Блогер Хонзода эри билан яшамаётгани, бир ойлик даромади ва сериаллардаги ролларни сотиб олишаётгани ҳақида