24-sentabr kuni Qozog‘iston o‘zbeklari etnomadaniy jamoat birlashmalari “Do‘stlik” hamjamiyati bilan hamkorlikda Chimkent shahrida O‘zbekiston turistik yarmarkasi tashkil etildi. Ushbu tadbir munosabati bilan Turizm va madaniy meros vazirligi tomonidan OAV vakillari uchun press-tur tashkil etildi, deb xabar bermoqda “Daryo” muxbiri.
O‘zbekiston va Qozog‘iston o‘rtasida diplomatik aloqalar o‘rnatilganining 30 yilligi munosabati bilan tashkil etigan tadbirda O‘zbekiston Respublikasi Vazirlar Mahkamasi huzuridagi millatlararo munosabatlar va xorijiy mamlakatlar bilan do‘stlik aloqalari qo‘mitasi xodimlari, Qozog‘iston xalqi assambleyasi, Chimkent shahri hokimiyati, Qozog‘iston o‘zbeklari etnomadaniy birlashmalari “Do‘stlik” hamjamiyati, O‘zbekistonning Qozog‘istondagi Bosh konsulxonasi vakillari, shuningdek, Qirg‘iziston, Tojikiston va O‘zbekistondan 50 nafardan ortiq o‘zbek millati hamda hamkor tashkilotlar vakillari ishtirok etdi.
Tadbirda O‘zbekistonda xizmat ko‘rsatgan san’atkorlar hamda madaniyat xodimlari o‘zbek milliy qo‘shiqlarini ijro etdi.
Tadbir davomida o‘zbek milliy liboslari ko‘rgazmasi ham o‘tkazildi.
Yarmarkada o‘zbek madaniyatini aks ettiruvchi milliy cholg‘u asboblar, musiqa va raqs, milliy liboslar, adabiyot asarlari ko‘rgazmalari tashkil etildi.
Ushbu turizm yarmarkasi O‘zbekistonning turistik salohiyatini namoyish etish, millatlar o‘rtasida do‘stona aloqalarni mustahkamlash, qozog‘istonlik turistlarni oqimini oshirish hamda ikki davlat o‘rtasida diplomatik munosabatlar o‘rnatilganiga 30 yil to‘lishi munosabati bilan tashkillashtirildi.
O‘zbek milliy oshxonasi taomlarini namoyish etish maqsadida O‘zbekiston Turizm va madaniy meros vazirligi buyurtmasiga asosan chimkentlik oshpazlar tomonidan 100 kilogramm osh tayyorlab, tadbir ishtirokchilari va mehmonlarga tortildi.
Izoh (0)