O‘zbekiston Tasviriy san’at galereyasida 2022-yilning 15-oktabrgacha taniqli o‘zbek haykaltaroshi Robert Avakyanning 90 yilligiga bag‘ishlangan ko‘rgazma bo‘lib o‘tmoqda.
Avakyan iqtidorli rassom, uning ijodi o‘ziga xos yechim va ijro uslubi bilan ajralib turadi. Ijodkor rassomlik ta’limini olgan bo‘lsa-da, haykaltarosh va monumental kompozitsiyalarning yaratuvchisi sifatida shuhrat qozongan. Uning mashhur monumental asarlaridan biri “Ikar” rassomga 1986-yilda Hamza nomidagi davlat mukofotini olib kelgan. Robert Avakyan nafis va shiddat bilan orzuga intilayotgan Ikar qiyofasini yuzaga chiqara olgan. Ikar obrazining plastik yechimi, shiddatli harakati va hissiy jihati o‘ta ta’sirli ifodalangan.
Ijodkorning qiziqishlari xilma-xil bo‘lib, klassik akademik shakllardan avangard yo‘nalishigacha, har bir asari o‘ziga xos hissiyotlarga ega. Ular lirika va tuyg‘ularning boyligi, o‘ychanlik va beparvolik, sevgi, intizorlik hissiyotlari bilan to‘ldirilgan. Ko‘rgazmada Avakyanning nafis rangtasvirga ega grafik asarlari ham namoyish etilgan.
“Daryo” fotomuxbiri ushbu ko‘rgazmada bo‘lib, u yerdagi ishlarni kadrlarga muhrladi.
Ma’lumot uchun, Robert Petrosovich Avakyan sovet rassomi, grafik bo‘yicha rassom va haykaltarosh. 1932-yil 18-iyulda Shimoliy Osetiyaning Orjonikidze (hozirgi Vladikavkaz) shahrida xizmatchi oilasida dunyoga kelgan. Leningrad davlat rassomchilik, haykaltaroshlik va arxitektura institutini tamomlagach, Qo‘qonga yuborilib, bir necha yil pedagogika institutida talabalarga saboq bergan. Haykaltarosh 1972-yilda oilasi bilan Toshkentga ko‘chib kelgan. Bir qator monumental asarlar yaratib, respublika va Butunittifoq ko‘rgazmalarida, xalqaro haykaltaroshlik tanlovlarida faol ishtirok etgan. 1991-yildan - O‘zbekiston Badiiy akademiyasi a’zosi bo‘lgan, 1988-2002-yillarda Toshkent, Buxoro, Nukus, Yangibozor shaharlarida yodgorlik asarlar yaratish bo‘yicha faol ishlar olib borgan. Robert Avakyan 2002-yil 14-iyunda vafot etgan.
Izoh (0)