Ўзбекистон Тасвирий санъат галереясида 2022 йилнинг 15 октябргача таниқли ўзбек ҳайкалтароши Роберт Авакяннинг 90 йиллигига бағишланган кўргазма бўлиб ўтмоқда.
Авакян иқтидорли рассом, унинг ижоди ўзига хос ечим ва ижро услуби билан ажралиб туради. Ижодкор рассомлик таълимини олган бўлса-да, ҳайкалтарош ва монументал композицияларнинг яратувчиси сифатида шуҳрат қозонган. Унинг машҳур монументал асарларидан бири «Ikar» рассомга 1986 йилда Ҳамза номидаги давлат мукофотини олиб келган. Роберт Авакян нафис ва шиддат билан орзуга интилаётган Ikar қиёфасини юзага чиқара олган. Ikar образининг пластик ечими, шиддатли ҳаракати ва ҳиссий жиҳати ўта таъсирли ифодаланган.
Ижодкорнинг қизиқишлари хилма-хил бўлиб, классик академик шакллардан авангард йўналишигача, ҳар бир асари ўзига хос ҳиссиётларга эга. Улар лирика ва туйғуларнинг бойлиги, ўйчанлик ва бепарволик, севги, интизорлик ҳиссиётлари билан тўлдирилган. Кўргазмада Авакяннинг нафис рангтасвирга эга график асарлари ҳам намойиш этилган.
«Дарё» фотомухбири ушбу кўргазмада бўлиб, у ердаги ишларни кадрларга муҳрлади.
Маълумот учун, Роберт Петросович Авакян совет рассоми, график бўйича рассом ва ҳайкалтарош. 1932 йил 18 июлда Шимолий Осетиянинг Оржоникидзе (ҳозирги Владикавказ) шаҳрида хизматчи оиласида дунёга келган. Ленинград давлат рассомчилик, ҳайкалтарошлик ва архитектура институтини тамомлагач, Қўқонга юборилиб, бир неча йил педагогика институтида талабаларга сабоқ берган. Ҳайкалтарош 1972 йилда оиласи билан Тошкентга кўчиб келган. Бир қатор монументал асарлар яратиб, республика ва Бутуниттифоқ кўргазмаларида, халқаро ҳайкалтарошлик танловларида фаол иштирок этган. 1991 йилдан - Ўзбекистон Бадиий академияси аъзоси бўлган, 1988-2002 йилларда Тошкент, Бухоро, Нукус, Янгибозор шаҳарларида ёдгорлик асарлар яратиш бўйича фаол ишлар олиб борган. Роберт Авакян 2002 йил 14 июнда вафот этган.
Изоҳ (0)