“Rossiyaning davlatchilik taqdiri shu oylarda asosiy yo‘nalish oladi” — siyosatshunos Kamoliddin Rabbimov

Rossiyaning davlatchilik taqdiri yaqin oylarda asosiy yo‘nalish oladi. Bu haqda siyosatshunos Kamoliddin Rabbimov Facebook’dagi sahifasida fikr bildirdi.

Kamoliddin Rabbimovning yozishicha, Rossiyaning kelgusi taqdiri Ukraina bilan bo‘layotgan urush natijalariga bog‘liq.

Rossiya—Ukraina urushining eng muhim tarixiy-siyosiy va geosiyosiy savoli — bu “XXI asrdan Rossiya o‘zining imperiyasini qayta tiklay oladimi, yo‘qmi?” bo‘lyapti. Yaqin o‘tmishda o‘tgan barcha sobiq imperiyalar qulagach, ko‘p o‘tmasdan o‘zlarining imperiyalarini sog‘ingan va imperiyachilik qudratini u yoki bu shaklda qayta jonlantirishga, tiklashga uringan.

Imperiyalar qulaganidan keyin ham osonlikcha jon bermaydi. Putin Rossiya imperiyachiligini tiklashni o‘zining tarixiy missiyasi sifatida ko‘rdi. Buning uchun ko‘p ishlar qildi.

Lekin Ukrainaga bostirib kirganidan so‘ng, Putinning imperiyachilik loyihasi haqiqiy imtihon tarozisiga tushdi. Harbiy safarbarlik ichki tanglikni ko‘rsatdi. Lekin XX asrda hududi jihatdan eng katta va yaxlit, mafkuraviy agressiv, ateistik imperiya qurgan Rossiyaning davlatchilik taqdiri shu oylarda asosiy yo‘nalish oladi.

Agar Ukrainani qisman bo‘lsa-da yutib, hazm qilishga muvaffaq bo‘lsa, imperiyachilik loyihasi yashashda davom etadi. Agar Ukrainada yutqazsa, imperiyachilik loyihasi o‘la boshlaydi. Rossiyada imperiyachilik loyihasi o‘la boshlasa, O‘zbekiston va Markaziy Osiyo tarixida mutlaq yangi davr boshlanadi, — deb yozgan siyosatshunos.

“Rossiya propagandasi, davlat rasmiylari bu urush cho‘zilyapti, sababi biz Ukraina bilan emas, NATO va kollektiv g‘arb bilan urishyapmiz, demoqda. Demak, bugun Putin nafaqat Ukrainaga qarshi, balki NATO va kollektiv g‘arbga qarshi harbiy safarbarlik e’lon qildi”, – deya fikrlarini bildirgan mutaxassis.