Ўзбекистонга Покистондан минг доллардан кайла думба зотли қўйлар олиб келинди. Бу ҳақда 25 сентябрь куни Ветеринария ва чорвачиликни ривожлантириш давлат қўмитаси томонидан ўтказилган «Наслли қўчқорлар кўргазмаси»да маълум қилинди.
Тадбиркор Озод Убайдуллаевнинг айтишича, Покистондан кайла думба зотли қўйлар Ўзбекистонга шу наслни кўпайтириш мақсадида олиб келинган.
«Олиб келишимиз сал қийинроқ бўлди. 15 бош қўйни Покистондан Афғонистонга, у ердан Қирғизистонга ва кейин Ўзбекистонга олиб келдик. Бизга кириб келиш нархи 1000 доллар атрофида тўғри келди.
Ҳозирча кўргазма йўналишда ишлаяпмиз. Ҳар хил ҳисори ва афғон зоти билан чатиштириб, кўпайтирмоқчимиз. Афғон зотли қўй билан чатиштириб кўрдик, натижа ёмон эмас», – деди Озод Убайдуллаев.
Унинг қўшимча қилишича, 4-5 ойлик қўзичоқларнинг тирик вазни 45-50 кило атрофида, тўрт тишли катта қўчқорларнинг бўйи бир метрдан баландроқ.
Қўмита томонидан берилган маълумотларга кўра, қўйларнинг Меринос, Романов, Эдилбой, Дорпер зотлари ҳамда эчкиларнинг Ангор, Мурсиано ва Занен зотлари чет давлатлардан келтирилиб кўпайтирилмоқда.
Маълумот учун: импорт қилинган бир бош наслли қўй-эчкиларга 400 минг сўм, 1 кг қорамол ва қўй гўшти учун 4 минг сўм субсидия ажратилиши белгиланган.
Изоҳ (0)