Markaziy osiyolik ayol dasturchilarga mo‘ljallangan Tumaris.Hack xakatonida ishtirok etish uchun arizalar qabul qilish boshlandi. Bu haqda IT Park xabar bermoqda.
Xakaton uchta yo‘nalishda o‘tkaziladi:
- FinTech — moliyaviy texnologiyalarni rivojlantirishga hissa qo‘shadigan yoki ushbu sohadagi muammolarni hal qiladigan ilovalar, veb-saytlar yoki samarali algoritmlarni ishlab chiqish;
- Elektron tijorat — sohadagi innovatsiyalar, ularning joriy etilishi, onlayn sotuvlar, eksport hajmini oshirish hamda mahalliy va tashqi bozorlarda tovarlarni ilgari surishda yordam berishi kerak;
- DeepTech — sun’iy intellekt, neyrotexnologiyalar, robototexnika va yangi materiallardan foydalangan holda mahsulotlarni ishlab chiqish.
Ishtirok etish uchun arizalar ham jamoaviy (3 kishigacha), ham yakka tartibda topshirilishi mumkin. Yakka tartibda ariza bergan ishtirokchilar kelgusida jamoalarga shakllantiriladi.
3 kishidan iborat jamoada ikkita ishtirokchi qizlardan iborat bo‘lishi yoki bir qiz jamoa boshqaruvchisi bo‘lishi kerak.
Tumaris.Hack – O‘zbekiston, Qozog‘iston, Qirg‘iziston, Tojikiston va Turkmaniston qizlari uchun mo‘ljallangan onlayn tanlov. Uning doirasida ishtirokchilar mentorlar ko‘magida ikki kun davomida ijtimoiy va iqtisodiy muammolarni yechishga mo‘ljallangan mahsulotlarning tajriba namunalarini ishlab chiqishi kerak.
Xakatonning umumiy mukofot jamg‘armasi: 8 ming AQSH dollari (qimmatbaho sovrinlar).
Arizalar 1-noyabrgacha qabul qilinadi. Tadbir 4—6-noyabr kunlari rus tilida onlayn formatda o‘tkaziladi.
Izoh (0)