Марказий осиёлик аёл дастурчиларга мўлжалланган Tumaris.Hack хакатонида иштирок этиш учун аризалар қабул қилиш бошланди. Бу ҳақда IT Park хабар бермоқда.
Хакатон учта йўналишда ўтказилади:
- FinTech — молиявий технологияларни ривожлантиришга ҳисса қўшадиган ёки ушбу соҳадаги муаммоларни ҳал қиладиган иловалар, веб-сайтлар ёки самарали алгоритмларни ишлаб чиқиш;
- Электрон тижорат — соҳадаги инновациялар, уларнинг жорий этилиши, онлайн сотувлар, экспорт ҳажмини ошириш ҳамда маҳаллий ва ташқи бозорларда товарларни илгари суришда ёрдам бериши керак;
- DeepTech — сунъий интеллект, нейротехнологиялар, робототехника ва янги материаллардан фойдаланган ҳолда маҳсулотларни ишлаб чиқиш.
Иштирок этиш учун аризалар ҳам жамоавий (3 кишигача), ҳам якка тартибда топширилиши мумкин. Якка тартибда ариза берган иштирокчилар келгусида жамоаларга шакллантирилади.
3 кишидан иборат жамоада иккита иштирокчи қизлардан иборат бўлиши ёки бир қиз жамоа бошқарувчиси бўлиши керак.
Tumaris.Hack – Ўзбекистон, Қозоғистон, Қирғизистон, Тожикистон ва Туркманистон қизлари учун мўлжалланган онлайн танлов. Унинг доирасида иштирокчилар менторлар кўмагида икки кун давомида ижтимоий ва иқтисодий муаммоларни ечишга мўлжалланган маҳсулотларнинг тажриба намуналарини ишлаб чиқиши керак.
Хакатоннинг умумий мукофот жамғармаси: 8 минг АҚШ доллари (қимматбаҳо совринлар).
Аризалар 1 ноябргача қабул қилинади. Тадбир 4—6 ноябрь кунлари рус тилида онлайн форматда ўтказилади.
Изоҳ (0)