Туркманистонда ҳайдовчилик гувоҳномасини олмоқчи ёки алмаштирмоқчи бўлган аёлларга нисбатан дискриминациянинг навбатдаги тўлқини давом этмоқда, деб ёзади «Хроника Туркменистана».
Нашр манбаларига кўра, Ички ишлар вазирлиги мутасаддилари 40 ёшга тўлмаган аёлларга машина сотиб олиш ва уни ўз номига расмийлаштиришни тақиқлаш тўғрисидаги яширин буйруққа амал қилмоқда.
Ашхободдаги ҳайдовчилик гувоҳномаларини берадиган ва алмаштирадиган полиция бўлимида 35 ёшгача бўлган аёллар учун тўсиқлар яратилмоқда, деб ёзади газета. Бундай аёллар гувоҳномаларни алмаштиришда ота-оналарининг (ёки бошқа қариндошларининг) автомашинага эгалик қилиши тўғрисидаги ҳужжатларни ҳамда улардан автомашинани бошқариш учун ишончномани тақдим этиши керак, чунки полициянинг фикрига кўра, аёлларнинг ўзлари автомашинага эгалик қилиш ҳуқуқига эга эмас. Аммо барча керакли ҳужжатларни тақдим этилгандан кейин ҳам янги гувоҳнома бериш жараёни жуда узоқ давом этиши мумкин.
Шу билан бирга, 40 ёшга тўлмаган аёллар қарийб 5000 доллар эвазига ҳайдовчилик гувоҳномасини олиш ёки янгилаш, шунингдек, транспорт воситасини ўз номига расмийлаштиришга муваффақ бўлган ҳолатлар ҳам учрамоқда.
Туркманистонда вақти-вақти билан аёлларга ҳайдовчилик гувоҳномаларини бериш ва узайтиришга яширин тақиқ қўйилади. Turkmenportal маълумотларига кўра, 2021 йилда бутун Туркманистон бўйлаб 27 мингдан ортиқ киши ҳайдовчилик курсларида қатнашган. Аммо уларнинг қанчаси аёллар бўлгани номаълум.
Изоҳ (0)