Yangi tadqiqot natijalariga ko‘ra, Yer yuzida istalgan lahzada taxminan 20 kvadrillion chumoli mavjud bo‘ladi. Bu 20 000 trillionta jonzot demakdir. Bu haqda Reuters xabar bermoqda.
Ushbu raqam avvalgilariga nisbatan ikkidan 20 martagacha kattaroqdir, deyiladi Proceedings of the National Academy of Sciences jurnalida e’lon qilingan maqolada.
“Bunchalik ko‘p sonli chumolilar borligini aniqlaganimizda o‘zimiz ham hayratga tushdik”, — dedi tadqiqot hammuallifi, Germaniyadagi Vyursburg universiteti vaqtinchalik bosh tadqiqotchisi, hasharotlar bo‘yicha ekolog Sabina Nooten.
“Shu paytgacha ilmiy adabiyotlarda qayd etilib kelgan raqamlar asosli taxminlardan iborat bo‘lgani sababli, tadqiqotimizning o‘ziga xosligi shundan iborat bo‘ldiki, biz ko‘plab empirik tadqiqotlar ma’lumotlarini (kuzatuv yoki tajribalar natijasida olingan ma’lumotlar) sintez qildik”, — dedi u.
Mashhur biologlar Bert Xyoldobler va Edvard o. Uilson tomonidan olib borilgan, chumolilar soni 1 kvadrilliondan 10 kvadrilliongacha deb belgilangan avvalgi global hisob-kitoblarga ko‘ra, chumolilar jami 1 kvintilliondan iborat dunyo hasharotlarining taxminan 1 foizini tashkil etardi.
Biroq so‘nggi tadqiqotlarni o‘tkazgan guruh dunyo bo‘ylab tarqalgan chumoli namunalari haqidagi ma’lumotlarga asoslandi. Mualliflar barcha qit’alarni va chumolilar yashaydigan asosiy biomlarni qamrab olgan 1306 ta joydan olingan namunalarni o‘z ichiga oluvchi 465 ta tadqiqotlarni aniqladi va baholadi.
Tadqiqot mualliflaridan yana bir Patrik Shultaysning aytishicha, qishloq xo‘jaligidagi yoki daraxtlarni kesish jarayonidagi o‘zgarishlar chumolilar soniga ta’sir qilishi mumkin.
Tadqiqot natijasida olingan ma’lumotlardan yana biri shu bo‘ldiki, chumolilarning taxminiy soni umumiy biomassadan, ya’ni yovvoyi qushlar va sut emizuvchilarning jami massasidan ko‘proq bo‘lib, odam biomassasining qariyb 20 foiziga tengdir.
Izoh (0)