Isroil bosh vaziri Yair Lapid va Turkiya prezidenti Rajab Toyyib Erdo‘g‘on Nyu-Yorkda Birlashgan Millatlar Tashkiloti Bosh Assambleyasi doirasida uchrashdi. Bu haqda Isroil bosh vaziri kanselyariyasining matbuot kotibi Orif Gendelman ma’lum qildi.
Bu ikki davlat yetakchilarining 2008-yildan beri ilk uchrashuv bo‘ldi. Bunga qadar Turkiya va Isroil diplomatik munosabatlari tiklanib, elchilarning ish joyiga qaytishi e’lon qilingandi.
Lapid va Erdo‘g‘on umumiy, jumladan, Isroildagi terrorizmga qarshi kurash mavzusini muhokama qildi. Isroil bosh vaziri Turkiya prezidentiga Eronning teraktlarga urinishlari paytida razvedka xizmatlari bilan hamkorlik qilgani uchun minnatdorlik bildirdi.
Bundan tashqari, Lapid Falastinning HAMAS harakati qo‘l ostidagi bedarak yo‘qolgan va asirga olingan isroilliklar va ularning vatanga qaytishi masalasini ko‘tardi.
Ularning suhbati mavzulari orasida iqtisodiy va energetika sohasidagi hamkorlik, mintaqadagi vaziyat, shuningdek, Isroildan Turkiyaga parvozlarni qayta tiklash masalalari ham bo‘lgan va buning uchun Lapid Erdo‘g‘onga minnatdorlik bildirgan.
2010-yil may oyida G‘azo qirg‘oqlari yaqinida ro‘y bergan mojarodan so‘ng Isroil va Turkiya diplomatik aloqalarini deyarli uzgan edi. O‘shanda Isroil qurolli kuchlari G‘azo sektoriga yordam yetkazayotgan Mavi Marmara kemasiga hujum qildi. Kemada jang boshlanib, to‘qqiz nafar turk fuqarosi halok bo‘lgan, bir necha Isroil askari yaralangan. Isroil hukumati hodisa uchun uzr so‘rashdan bosh tortgan va Turkiyani terrorizmni qo‘llab-quvvatlashda ayblagan.
Izoh (0)