Milliarder Alisher Usmonovning Germaniyadagi bir nechta ko‘chmas mulk obyektlarida politsiya va soliq organlari tintuv o‘tkazmoqda. Bu haqda Germaniyaning Der Spiegel nashri xabar berdi.
Tadbirkor soliqlar to‘lashdan bosh tortishda va pul yuvishda gumonlanmoqda. Nashr ma’lumotlariga ko‘ra, so‘nggi sakkiz yil davomida oligarx qariyb 555 million yevro qiymatidagi soliqlarni to‘lamagan.
“Reydning maqsadi avvalroq Usmonovga nisbatan tashqi savdo to‘g‘risidagi qonunni buzish, pul yuvish va soliq to‘lashdan bosh tortish gumonlari bo‘yicha yopib yuborilgan ishlarga oid dalillarni qidirishdan iborat”, — deyiladi xabarda.
Aniqlik kiritilishicha, tergov bir necha davomida Usmonov haqida ma’lumot to‘plagan. Ayni paytda politsiya oligarxning Bavariyadagi uyida tintuv olib bormoqda. Tezkor harakatlar tadbirkorning Myunxen yaqinidagi Tegernzee ko‘lida joylashgan villalarida ham o‘tkazilmoqda.
21-sentabr kuni Germaniya politsiyasi maxsus topshiriqli bo‘linmalari Usmonovning Rottax-Egerndagi yana uchta uy-joyida tintuv o‘tkazish uchun orderni qo‘lga kiritgan. Taftishlarda 250 nafar politsiya xodimi qatnashmoqda.
Ukrainada maxsus operatsiya boshlanganidan keyin Yevroittifoq rossiyalik milliarderga qarshi sanksiyalar kiritgandi. Ayni paytda, nashr ma’lumotlariga ko‘ra, Usmonov O‘zbekistonda bo‘lib turibdi. Germaniya O‘ir jinoyatlar va uyushgan jinoyatchilikka qarshi kurash boshqarmasi banklardan pul yuvish gumonlari bo‘yicha 100 ga yaqin hisobot to‘plagan bo‘lib, ular Usmonovning operatsiyalariga aloqadorligi aytilmoqda.
Bundan tashqari, 2014-yildan 2022-yilgacha bo‘lgan davrda Usmonov jami 555 million yevroga teng daromad va sovg‘a soliqlarini to‘lamay kelgan. 2014-yildan buyon milliarder asosan Tegernzee ko‘lida istiqomat qilgan.
Avvalroq Alisher Usmonovning singlisi hamda “Arsenal” futbol klubining sobiq aksiyadori, Ukrainadagi urushga javoban tuzilgan Yevropa Ittifoqining sanksiyalar ro‘yxatidan o‘chirilgani xabar berilgan edi.
USM Holdings asoschisi, milliarder Alisher Usmonov 28-fevral kuni, Ukrainada Rossiya operatsiyasi boshlanganidan keyin to‘rt kun o‘tib, Yevroittifoq sanksiyalariga uchragan edi. Biznesmen Bryusselning bu qaroridan norozi bo‘lib, may boshida Yevropa umumiy yurisdiksiya sudiga apellyatsiya berdi. U suddan apellyatsiya bo‘yicha yakuniy qaror qabul qilinguniga qadar sanksiyalar amal qilishini to‘xtatib qo‘yishni so‘radi. Usmonovga qarshi AQSH, Kanada, Buyuk Britaniya va Yaponiya ham sanksiyalar kiritgan.
May oyining ikkinchi yarmida Usmonov The Times gazetasi talqini bo‘yicha Buyuk Britaniyaning eng badavlat odamlari o‘nligidan chiqib ketdi.
Izoh (0)