Янги тадқиқот натижаларига кўра, Ер юзида исталган лаҳзада тахминан 20 квадриллион чумоли мавжуд бўлади. Бу 20 000 триллионта жонзот демакдир. Бу ҳақда Reuters хабар бермоқда.
Ушбу рақам аввалгиларига нисбатан иккидан 20 мартагача каттароқдир, дейилади Proceedings of the National Academy of Sciences журналида эълон қилинган мақолада.
«Бунчалик кўп сонли чумолилар борлигини аниқлаганимизда ўзимиз ҳам ҳайратга тушдик», — деди тадқиқот ҳаммуаллифи, Германиядаги Вюрсбург университети вақтинчалик бош тадқиқотчиси, ҳашаротлар бўйича эколог Сабина Ноотен.
«Шу пайтгача илмий адабиётларда қайд этилиб келган рақамлар асосли тахминлардан иборат бўлгани сабабли, тадқиқотимизнинг ўзига хослиги шундан иборат бўлдики, биз кўплаб эмпирик тадқиқотлар маълумотларини (кузатув ёки тажрибалар натижасида олинган маълумотлар) синтез қилдик», — деди у.
Машҳур биологлар Берт Хёлдоблер ва Эдвард о. Уилсон томонидан олиб борилган, чумолилар сони 1 квадриллиондан 10 квадриллионгача деб белгиланган аввалги глобал ҳисоб-китобларга кўра, чумолилар жами 1 квинтиллиондан иборат дунё ҳашаротларининг тахминан 1 фоизини ташкил этарди.
Бироқ сўнгги тадқиқотларни ўтказган гуруҳ дунё бўйлаб тарқалган чумоли намуналари ҳақидаги маълумотларга асосланди. Муаллифлар барча қитъаларни ва чумолилар яшайдиган асосий биомларни қамраб олган 1306 та жойдан олинган намуналарни ўз ичига олувчи 465 та тадқиқотларни аниқлади ва баҳолади.
Тадқиқот муаллифларидан яна бир Патрик Шултайснинг айтишича, қишлоқ хўжалигидаги ёки дарахтларни кесиш жараёнидаги ўзгаришлар чумолилар сонига таъсир қилиши мумкин.
Тадқиқот натижасида олинган маълумотлардан яна бири шу бўлдики, чумолиларнинг тахминий сони умумий биомассадан, яъни ёввойи қушлар ва сут эмизувчиларнинг жами массасидан кўпроқ бўлиб, одам биомассасининг қарийб 20 фоизига тенгдир.
Изоҳ (0)