«Тошкент шаҳрида тирбандлик масаласига охирги 5 йилда катта эътибор қаратилмоқда» – Фурқат Маҳмудхўжаев

Тошкент шаҳрида Ўзбекистонда барқарор ҳаракатланиш ва соғлом турмуш тарзига бағишланган тўртинчи Европа ҳаракатланиш ҳафталиги бошланди. Тадбирлар аҳолини жамоат транспортида, велосипедда ва пиёда ҳаракатланишга жалб қилиш орқали автомобиллардан чиқадиган заҳарли газларни камайтириб, ҳаво ифлосланишининг олдини олишга қаратилган.

Тошкент шаҳар ҳокимлиги қошидаги жамоатчилик кенгаши раиси Фурқат Маҳмудхўжаевнинг «Дарё» мухбирига маълум қилишича, Тошкент шаҳрида тирбандлик масаласига охирги 5 йилда катта эътибор қаратилмоқда.

«Автобуслар энди кўпая бошлади. Аҳамият берилса, метрода тирбандлик куннинг маълум пайтидагина бўлади. Эрталаб, кечқурун ва пешиндан кейин ҳам озгина пайт оралиғида кузатилади. Буни аниқ айтаётганим сабаби шундаки, ўзим ҳам кўп метрода юраман. Тан олишимиз лозимки, шаҳар транспорти бизда энди ривожланмоқда. Электробуслар олиб келиняпти. Автобуслар сотиб олинмоқда. Бундан тўғри фойдаланиш керак. Айниқса, ёшларимиз жамоат транспортига чиққанда ёзиб, чизиб кетмасликларини илтимос қиламиз, чунки бундан ўзимиз фойдаланамиз», — деди кенгаш раиси.

Унинг қўшимча қилишича, велосипедда ҳаракатланиш учун шаҳарда жуда катта ишлар қилинган.

«Лекин камчиликларни ҳам кўриб турибмиз. Велосипедда ҳаракатланиб, маълум пайтдан кейин ноқулайликлар сабаб ҳаракатланишни тўхтатишга мажбур бўляпмиз», — деди Фурқат Маҳмудхўжаев.

Маълумот учун, тўртинчи Европа ҳаракатланиш ҳафталиги 19—25 сентябрь кунлари ўтказилиши режалаштирилган. Хусусан, «Маҳаллалар Европа ҳаракатланиш ҳафтаси тарафдори», «Автомобильсиз велоҳаракат куни», «Автомобильсиз кун» каби тадбирлар ўтказиш кўзда тутилган.

Эслатиб ўтамиз, Ўзбекистонда тартибга солинмаган серқатнов пиёдалар ва велосипедда ҳаракатланувчилар учун ўтиш йўлларида махсус светофорлар ўрнатилиши ҳамда 2021 йил июлдан бошлаб вазир ва ҳокимларнинг семизлик даражасини онлайн кузатиб бориш тизими йўлга қўйилиши ҳақида хабар берилганди.