Toshkent shahrida Butunjahon tozalik kuni munosabati bilan tozalash tadbirini o‘tkazish maqsadida chiqindilar yig‘ilib qolgan, yomon ahvoldagi nuqta topilmagan. Bu haqda Ekologiya va atrof-muhitni muhofaza qilish davlat qo‘mitasi raisi o‘rinbosari Islombek Boqijonov “Daryo” muxbiriga bergan qisqacha intervyusida aytib o‘tdi:
Islombek Boqijonovning ma’lum qilishicha, sentabr oyining uchinchi shanbasi Butunjahon tozalik kuni deb e’lon qilingan bo‘lib, O‘zbekistonda ushbu kun 2019-yildan buyon o‘tkazib kelinadi.
“Avvalgi yillarga nisbatan bu yil qatnashchilar ko‘paydi. Volontyorlar, qiziquvchilar, davlat ishchilari va qo‘mitaning to‘liq tarkibi respublikaning 14 ta hududida mana shunday tadbirlarni o‘tkazmoqda. Mazkur tadbirni o‘tkazish uchun Toshkent shahridagi chiqindi to‘plangan, eng yomon ahvoldagi nuqtalarni qidirdik, biroq topa olmadik. Bu ham bir xursandchilik. O‘tgan yili qarovsiz parklarimiz bor edi. Bu yil bunday joylar qolmadi”, — dedi qo‘mita vakili.
Ta’kidlanishicha, Toshkent shahrida, umuman viloyat markazlarida tozalik, obodonlashtirish, daraxtlar, ko‘kalamzorlashtirish masalalari nazorat ostiga olingan.
“Muammolarni doimiy bartaraf qilish choralari ko‘rib borilmoqda. Biz bu yil Toshkent viloyatidagi kanal bo‘yida taxminan 5 gektardan kattaroq masofada tozalik ishlarini olib boryapmiz. Natijada 10-15 mashina chiqindi chiqish holatlari kuzatilyapti. Umuman olganda, respublikada 35-40 mingdan ziyod obodonlashtirish xodimlari bor. Ular ertalab soat 4 yoki 5 dan turadi va kun davomida shaharni tozalaydi. Chiqindilarni yig‘adi. Ariq bo‘ylarini supuradi. Ularning faoliyati boshqa fuqarolar tomonidan chiqindini belgilanmagan joyga tashlangani, tabiatga tartibsiz muomalada bo‘lganidan kelib chiqadi. Ular doimiy ravishda saharda turib, bizning tozaligimiz uchun, ko‘zimizga yomon holatni ko‘rsatmaslik uchun ishlaydi. Keyingi yillarda obodonlashtirish xodimlari uchun Butunjahon tozalik kunini dam oladigan holatga o‘tkazib, ularning o‘rniga o‘zimiz ishlashni maqsad qilyapmiz”, — dedi Islombek Boqijonov.
Uning qo‘shimcha qilishicha, qurilish yo‘nalishida faoliyat olib boradigan tadbirkorlar bilan hamkorlikda oyning bir kunini tozalik kuni deb e’lon qilish rejalashtirilgan.
Izoh (0)