Суперлига иштирокчилари сонини 16 тага етказиш таклиф этилгани маълум бўлди

ПФЛ Суперлига мураббийлари билан 2023 йилги мавсум бўйича йиғилиш ўтказган. Унда чемпионатдаги жамоалар сонини 16 тага ошириш таклиф этилган.

«Динамо» бош мураббийи Вадим Абрамов «Championat.asia» билан бўлган суҳбатда бу ҳақида маълум қилган.

Айтилишича, Самвел Бабаян ва Миржалол Қосимов Суперлига жамоалари сонини 16 тага етказиш бўйича таклифни илгари сурган.

Ўз навбатида Абрамов ҳам бу таклифни қўллаб-қувватлаган. Шундан кейин мутахассис ва ПФЛ бош директори Диёр Имомхўжаев ўртасида тортишув юзага келган.

«Клублар сони 16 та бўлиши таклифи Самвел Бабаян ва Миржалол Қосимов томонидан илгари сурилди. Аммо ПФЛ бош директори агар шундай бўлса Про-Лигадан Суперлигага чиқадиган клублар қолмаслигини айтди ва Про-Лига клубларида пул йўқлигини билдирди.

Шундан кейин мен Про-Лигада пул йўқлигининг Суперлигага нима алоқаси борлигини сўрадим. Мен 14 та клуб кам дедим, 16 та ёки 20 та бўлсин деганим йўқ. 14 та клуб бўлса ўйинлар сони кам бўлади дедим. Диёр Имомхўжаев менга сиз терма жамоа ҳақида умуман гапирманг деди ва ҳақорат қилди. Шундан кейин мажлисни тарк этдим», — деган Абрамов.

Вадим Абрамов қўл остидаги «Динамо» Суперлига 19-туридан кейин 8 очко билан сўнгги ўринда бормоқда.