Xitoyning CAMCE kompaniyasi O‘zbekistonda dor yo‘llarini quradi. Bu haqda Turizm va madaniy meros vazirligi matbuot xizmati xabar berdi.
Ma’lum qilinishicha, 16-sentabr kuni Turizm va madaniy meros vazirligi hamda Injiniring bo‘yicha Xitoyning CAMCE korporatsiyasi tomonidan hamkorlik haqidagi memorandum imzolandi.
Turizm sohasida o‘zaro foydali hamkorlik qilish va do‘stona munosabatlarni qo‘llab-quvvatlash, tenglik qoidalari va o‘zaro hurmatga asoslangan memorandumda quyidagilar muvofiqlashtirilgan:
- O‘zbekistonda investitsion qurilish loyihalarini amalga oshirish va dor yo‘llarini ekspluatatsiya qilish bo‘yicha hamkorlik o‘rnatish;
- bitim doirasida investitsion loyihalarni ommalashtirish uchun ekspertlarni jalb qilish;
- dor yo‘llarini qurishga mo‘ljallangan joylarni tanlash hamda hamkorlikning texnik va moliyaviy darajadagi tafsilotlarini aniqlashtirish uchun mutaxassislar guruhini yuborish;
- dor yo‘llarini ekspluatatsiya qilish va boshqarish bo‘yicha o‘quv tashkillashtirish.
Bundan tashqari, mazkur bitimni tayyorlash doirasida Injiniring bo‘yicha Xitoyning CAMCE korporatsiyasi vakillari hududning infratuzilma sharoitlarini o‘rganish uchun Bo‘stonliq tumaniga tashrif buyurgan. Tashrif davomida Xitoy korporatsiyasining delegatsiyasi “Chorvoq” TRZ direksiyasining investitsion loyihalari, shuningdek, tumanda dor yo‘llarini qurishga qiziqish bildirgan.
Injiniring bo‘yicha Xitoyning CAMCE korporatsiyasi OAJ (China CAMC Engineering Co., Ltd.) XXR markaziy hukumatining boshqaruvidagi davlat korxonasi bo‘lgan — Xitoy milliy mashinasozlik korporatsiyasi (Sinomach) tarkibiga kiradi.
Izoh (0)