Хитой компанияси Ўзбекистонда дор йўлларини қуради

Хитойнинг CAMCE компанияси Ўзбекистонда дор йўлларини қуради. Бу ҳақда Туризм ва маданий мерос вазирлиги матбуот хизмати хабар берди.

Маълум қилинишича, 16 сентябрь куни Туризм ва маданий мерос вазирлиги ҳамда Инжиниринг бўйича Хитойнинг CAMCE корпорацияси томонидан ҳамкорлик ҳақидаги меморандум имзоланди.

Туризм соҳасида ўзаро фойдали ҳамкорлик қилиш ва дўстона муносабатларни қўллаб-қувватлаш, тенглик қоидалари ва ўзаро ҳурматга асосланган меморандумда қуйидагилар мувофиқлаштирилган:

• Ўзбекистонда инвестицион қурилиш лойиҳаларини амалга ошириш ва дор йўлларини эксплуатация қилиш бўйича ҳамкорлик ўрнатиш;
• битим доирасида инвестицион лойиҳаларни оммалаштириш учун экспертларни жалб қилиш;
• дор йўлларини қуришга мўлжалланган жойларни танлаш ҳамда ҳамкорликнинг техник ва молиявий даражадаги тафсилотларини аниқлаштириш учун мутахассислар гуруҳини юбориш;
• дор йўлларини эксплуатация қилиш ва бошқариш бўйича ўқув ташкиллаштириш.

Бундан ташқари, мазкур битимни тайёрлаш доирасида Инжиниринг бўйича Хитойнинг CAMCE корпорацияси вакиллари ҳудуднинг инфратузилма шароитларини ўрганиш учун Бўстонлиқ туманига ташриф буюрган. Ташриф давомида Хитой корпорациясининг делегацияси «Чорвоқ» ТРЗ дирекциясининг инвестицион лойиҳалари, шунингдек, туманда дор йўлларини қуришга қизиқиш билдирган.

Инжиниринг бўйича Хитойнинг CAMCE корпорацияси ОАЖ (China CAMC Engineering Co., Ltd.) ХХР марказий ҳукуматининг бошқарувидаги давлат корхонаси бўлган — Хитой миллий машинасозлик корпорацияси (Sinomach) таркибига киради.