Qamchiq dovonida Volvo yuk mashinasi ag‘darilib ketdi. Bu haqda FVV matbuot xizmati xabar berdi.
Ma’lum qilinishicha, 19-sentabr kuni soat 07:20 da A-373 avtomobil yo‘lining Qamchiq dovonidan o‘tgan 196 kilometrida, Toshkent—Vodiy yo‘nalishda sigareta bilan harakatlanib ketayotgan Volvo yuk mashinasi haydovchisi boshqaruvni yo‘qotib, yo‘lni ajratuvchi beton to‘siqqa urilgan. Oqibatda yuk mashinasi ag‘darilib ketgan. Avtomashinada haydovchining o‘zi bo‘lgan.
Voqea joyiga zudlik bilan “Qamchiq” Maxsus qidiruv, yong‘in-qutqaruv boshqarmasi qutqaruvchilari va YPX xodimlari yetib borgan. Qutqaruvchilar maxsus asbob-anjomlar va Favqulodda vaziyatlar davlat quyi tizimiga kiruvchi tashkilotlar texnikalarini jalb qilgan holda yuk mashinasini yo‘l chetidagi xavfsiz hududga olib chiqib, haydovchiga amaliy yordam ko‘rsatgan.
Hodisa oqibatida tan jarohati olgan va halok bo‘lganlar yo‘q.
Qamchiq dovonida 10-sentabr kuni aynan shu rusumli yuk mashinasi ishtirokida to‘rt kishining o‘limi bilan yakunlangan yirik YTH yuz bergan edi. Volvo yuk mashinasi o‘zi bilan bir yo‘nalishda harakatlanib ketayotgan Matiz, Cobalt, Isuzu yuk mashinasi, Nexia-2, Cobalt, MAN yuk mashinasi, Cobalt va Spark’ni urib yuborishi oqibatida ushbu transportlarning 6 tasi yonib ketgandi.
Izoh (0)