Бирлашган Миллатлар Ташкилоти «Толибон»ни Афғонистондаги қизларнинг ўрта мактабда ўқишига рухсат беришга чақирди. Бу ҳақда БМТнинг Афғонистонга ёрдам миссияси сайтида айтилган.
БМТ миссияси Афғонистонда қизлар учун ўрта мактаблар бутунлай ёпилганига бир йил тўлгани муносабати билан баёнот бериб, таълимни тақиқлаш қизлар ва аёлларнинг асосий ҳуқуқларини поймол қилиш эканини таъкидлади.
«Бу фожиали, шармандали йил бўлди, унинг олдини олиш керак эди. Қизларнинг ўрта мактабдан узилиб қолиши ҳеч қандай жиддий асосга эга эмас ва дунёнинг ҳеч бир жойида кузатилмайди. Бу қизлар авлоди ва Афғонистон келажагига жиддий зарар етказади», — дейди БМТ миссияси раҳбари вазифасини бажарувчи Маркус Поцел.
«Толибон» 2021 йилнинг август ойида Афғонистонда ҳокимиятни қўлга киритгач, қизлар учун ўрта таълимни расман тақиқлаган эди. 2021 йил 18 сентябрда ўғил болалар ўрта мактаблари қайта очилди, бироқ қизларнинг дарсга бориши тақиқланди. Бир неча ой ўтиб, 23 март куни «Толибон» Таълим вазирлиги қизлар учун ўрта мактабларни очган, аммо бир неча соат ўтгач, толиблар раҳбарияти синфларни яна ёпишни буюрган.
БМТ миссияси ҳисоб-китобларига кўра, Афғонистонда, биринчи навбатда, 12 ёшдан 18 ёшгача бўлган миллиондан ортиқ қизлар таълим олиш имкониятидан маҳрум.
Изоҳ (0)