Rossiyaning Belgorod viloyati Valuyki shahri Ukraina tomonidan o‘qqa tutildi, deb yozadi “RBK” gubernator Vyacheslav Gladkovga tayanib.
Dastlabki ma’lumotlarga ko‘ra, bir kishi halok bo‘lgan, yana ikki kishi yaralangan.
“Ukraina Qurolli kuchlari Valuykini o‘qqa tutdi. Havo hujumiga qarshi mudofaa tizimi ishlab ketdi, ammo yerda vayronagarchiliklar bor”, — deb yozdi gubernator o‘z Telegram-kanalida.
Xususan, podstansiyaga zarar yetdi, natijada shaharda elektr ta’minoti ishdan chiqdi. Bundan tashqari, sakkizta xususiy uy va uchta mashina yonib ketdi.
Voqea joyiga FVV hududiy boshqarmasi boshlig‘i va boshqa rahbariyat vakillari, shuningdek, tezkor xizmatlar yetib keldi.
Belgorod viloyati ma’muriyati aholi punktlari Ukraina hududidan o‘qqa tutilgani haqida avval ham bir necha marta ma’lum qilgan. Yaqinda gubernator Ukraina harbiylari Xarkov viloyati bilan chegaradosh bo‘lgan Krasniy Xutor qishlog‘iga ketma-ket ikki kundan buyon o‘q yomg‘iri yog‘dirayotganini aytgandi. Chegara yaqinida yashaydigan odamlar evakuatsiya qilingan.
Keyinroq Xarkov viloyatiga yondosh Nexoteyevka qishlog‘i ham nishon ostida qoldi, u yerda aholining aksariyati bahordayoq ko‘chirib yuborilgandi.
Izoh (0)