O‘zbekiston futbol assotsiatsiyasi (O‘FA) Etika qo‘mitasi “Lokomotiv” yarim himoyachisi Kaxi Maxaradze va klubning boshqa o‘yinchilarining totalizator hamda kelishilgan o‘yinlarga aloqadorligi masalasi yuzasidan qaror chiqardi.
Qo‘mita avvalroq OAVda tarqalgan ma’lumotlarni o‘rgangan va “temiryo‘lchilar” futbolchilari Kaxi Maxaradze hamda Yevgeniy Kochnevni aybdor deb topgan.
Maxaradze ushbu qilmishi uchun 5 yilga futbolga oid faoliyatdan chetlatilgan va unga nisbatan 100 million so‘m jarima qo‘llanilgan. Kochnev esa 3 yilga diskvalifikatsiya qilingan hamda 30 million jarimaga tortilgan.
Quyida O‘FAning ushbu masala yuzasidan bayonoti bilan tanishing:“Lokomotiv” futbolchisi Kaxi Maxaradze, futbolchi Yevgeniy Kochnev, Gruziya fuqarolari G.K. va Ch.M. ismli shaxslar o‘zaro til biriktirib, firibgarlik yo‘li bilan boylik orttirish maqsadida, xitoylik o‘zini Jay deb tanishtirgan shaxsning ishonchiga kirib, totalizator kontoralari orqali “Lokomotiv” futbol klubining uchrashuvlarini Kaxi Maxaradze va boshqa futbolchilar bilan kelishgan holda o‘zlari uchun qoniqarli natija bilan yakunlashga yolg‘on va’da berib, ishontirgan.
Xususan, 2022-yil 27-may kungi “Navbahor” – “Lokomotiv” uchrashuvida 2:0 hisobi qayd etilgan bo‘lib, Maxaradze, G.K., Ch.M. va Kochnev mazkur o‘yin uchun Jay ismli shaxsdan taxminan 30 ming AQSH dollari olib, o‘zaro bo‘lishib olgan.
Bundan tashqari “Lokomotiv”ning “OKMK” va “So‘g‘diyona” klublariga qarshi uchrashuvlariga yuqoridagi shaxslar tomonidan pul tikish masalasi muhokama qilingan bo‘lsa-da, lekin bu amalga oshmagani aniqlangan (ushbu ma’lumot OFK va “Sportradar” tashkilotlari tomonidan ham tasdiqlangan).
Shundan so‘ng “Lokomotiv”ning mehmonda “Nasaf”ga qarshi uchrashuvda mag‘lub bo‘lishini taxmin qilib, Maxaradze bu o‘yinni yutqazib berishiga Jayni ishontirgan va u tomonidan totalizatorda pul tikilishiga sababchi bo‘lgan.
“Lokomotiv” va “Nasaf” jamoalari o‘rtasidagi uchrashuv 0:0 hisobi bilan yakunlanganidan so‘ng, Jay o‘zi tomonidan yutqazilgan 100 ming dollarni Maxaradze, Ch.M., G.K. va Kochnevdan talab qilgan. Rad javobi olgach, o‘ch olish maqsadida ular haqidagi ma’lumotlarni O‘FA va turli OAVning elektron pochtalariga yuborgan.
O‘FA tomonidan tekshiruv boshlangach, Jay noqonuniy faoliyati natijasida o‘z mamlakatining tegishli tashkilotlari tomonidan javobgarlikka tortilishi mumkinligini anglab, yuqorida yuborgan ma’lumotlar noto‘g‘riligi, suratlarni o‘zi yasaganligi haqida xabar yuborgan.
Yuqoridagilarni o‘rganib chiqish natijasida O‘FA Etika qo‘mitasi yig‘ilishining qaroriga ko‘ra, Kaxi Maxaradze Intizom kodeksining tegishli bandlari bo‘yicha aybdor deb topilib, unga nisbatan futbol bilan bog‘liq faoliyatning barcha turlaridan 5 yil muddatga chetlatilib, 100 million so‘m miqdorida jarima jazosi tayinlangan.
Shuningdek, futbolchi Yevgeniy Kochnev ham Intizom kodeksining tegishli bandlari bilan aybdor deb topilib, unga nisbatan futbol bilan bog‘liq faoliyatning barcha turlaridan 3 yil muddatga chetlatilib, 30 million so‘m miqdorida jarima jazosi tayinlangan.
Tekshiruv davomida “Lokomotiv”ning boshqa futbolchilari va murabbiylari totalizator hamda kelishilgan o‘yinlarda ishtirok etmaganligi aniqlangan.
Mazkur holat yuzasidan unga aloqador bo‘lgan chet el fuqarolarining shubhali harakatlari bo‘yicha ma’lumotlar tegishli xalqaro tashkilotlarga yuborildi.
O‘FA bayonoti
Izoh (0)