Ўзбекистон футбол ассоциацияси (ЎФА) Этика қўмитаси «Локомотив» ярим ҳимоячиси Кахи Махарадзе ва клубнинг бошқа ўйинчиларининг тотализатор ҳамда келишилган ўйинларга алоқадорлиги масаласи юзасидан қарор чиқарди.
Қўмита аввалроқ ОАВда тарқалган маълумотларни ўрганган ва «темир йўлчилар» футболчилари Кахи Махарадзе ҳамда Евгений Кочневни айбдор деб топган.
Махарадзе ушбу қилмиши учун 5 йилга футболга оид фаолиятдан четлатилган ва унга нисбатан 100 миллион сўм жарима қўлланилган. Кочнев эса 3 йилга дисквалификация қилинган ҳамда 30 миллион жаримага тортилган.
Қуйида ЎФАнинг ушбу масала юзасидан баёноти билан танишинг:«Локомотив» футболчиси Кахи Махарадзе, футболчи Евгений Кочнев, Грузия фуқаролари Г.К. ва Ч.М. исмли шахслар ўзаро тил бириктириб, фирибгарлик йўли билан бойлик орттириш мақсадида, хитойлик ўзини Жай деб таништирган шахснинг ишончига кириб, тотализатор конторалари орқали «Локомотив» футбол клубининг учрашувларини Кахи Махарадзе ва бошқа футболчилар билан келишган ҳолда ўзлари учун қониқарли натижа билан якунлашга ёлғон ваъда бериб, ишонтирган.
Хусусан, 2022 йил 27 май кунги «Навбаҳор» – «Локомотив» учрашувида 2:0 ҳисоби қайд этилган бўлиб, Махарадзе, Г.К., Ч.М. ва Кочнев мазкур ўйин учун Жай исмли шахсдан тахминан 30 минг АҚШ доллари олиб, ўзаро бўлишиб олган.
Бундан ташқари «Локомотив»нинг «ОКМК» ва «Сўғдиёна» клубларига қарши учрашувларига юқоридаги шахслар томонидан пул тикиш масаласи муҳокама қилинган бўлса-да, лекин бу амалга ошмагани аниқланган (ушбу маълумот ОФК ва «Спортрадар» ташкилотлари томонидан ҳам тасдиқланган).
Шундан сўнг «Локомотив»нинг меҳмонда «Насаф»га қарши учрашувда мағлуб бўлишини тахмин қилиб, Махарадзе бу ўйинни ютқазиб беришига Жайни ишонтирган ва у томонидан тотализаторда пул тикилишига сабабчи бўлган.
«Локомотив» ва «Насаф» жамоалари ўртасидаги учрашув 0:0 ҳисоби билан якунланганидан сўнг, Жай ўзи томонидан ютқазилган 100 минг долларни Махарадзе, Ч.М., Г.К. ва Кочневдан талаб қилган. Рад жавоби олгач, ўч олиш мақсадида улар ҳақидаги маълумотларни ЎФА ва турли ОАВнинг электрон почталарига юборган.
ЎФА томонидан текширув бошлангач, Жай ноқонуний фаолияти натижасида ўз мамлакатининг тегишли ташкилотлари томонидан жавобгарликка тортилиши мумкинлигини англаб, юқорида юборган маълумотлар нотўғрилиги, суратларни ўзи ясаганлиги ҳақида хабар юборган.
Юқоридагиларни ўрганиб чиқиш натижасида ЎФА Этика қўмитаси йиғилишининг қарорига кўра, Кахи Махарадзе Интизом кодексининг тегишли бандлари бўйича айбдор деб топилиб, унга нисбатан футбол билан боғлиқ фаолиятнинг барча турларидан 5 йил муддатга четлатилиб, 100 миллион сўм миқдорида жарима жазоси тайинланган.
Шунингдек, футболчи Евгений Кочнев ҳам Интизом кодексининг тегишли бандлари билан айбдор деб топилиб, унга нисбатан футбол билан боғлиқ фаолиятнинг барча турларидан 3 йил муддатга четлатилиб, 30 миллион сўм миқдорида жарима жазоси тайинланган.
Текширув давомида «Локомотив»нинг бошқа футболчилари ва мураббийлари тотализатор ҳамда келишилган ўйинларда иштирок этмаганлиги аниқланган.
Мазкур ҳолат юзасидан унга алоқадор бўлган чет эл фуқароларининг шубҳали ҳаракатлари бўйича маълумотлар тегишли халқаро ташкилотларга юборилди.
ЎФА баёноти
Изоҳ (0)