Туристлар Самарқандда 580 млн доллар эвазига қад ростлаган халқаро туризм маркази ва «Боқий шаҳар»ни 18 сентябрдан бошлаб томоша қилиши мумкинлиги маълум қилинди (видео)

Самарқанд вилояти ҳокими ўринбосари Рустам Қобиловнинг «Дарё»га маълум қилишича, туристлар ШҲТнинг Самарқанддаги саммити доирасида қурилган, Марказий Осиёнинг замонавий, диққатга сазовор масканига айланиши мўлжалланган — «Буюк ипак йўли» халқаро туризм марказига 18 сентябрдан бошлаб кириши мумкин.

ШҲТнинг Самарқанддаги саммитига жуда катта тайёргарлик кўрилди. Меҳмонларни муносиб кутиб олишга жиддий эътибор берилмоқда. Янги комплекслар, меҳмонхоналар, йўллар, янги инфротузилмалар бунёд этилди. Халқаро туризм маркази қурилиб фойдаланишга топширилди. Унинг таркибида 8 та замонавий меҳмонхона, шундан иккитаси беш юлдузли, иккитаси тўрт юлдузли ва тўрттаси уч юлдузли, умумий ҳисобда 1275 ўринга эга бўлган замонавий меҳмонхоналар қурилиб, фойдаланишга топширилди.

Меҳмонларимиз Марказий Осиё давлатларидан эканлигини инобатга олган ҳолда, уларни Ўзбекистонга, жумладан, Самарқандга қизиқишини таҳлил қилиб, уларнинг бу ерда бўлиб турган вақтини самарали ўтказиш мақсадида Туризм ва маданий мерос вазирлиги, Самарқанд вилоят ҳокимлиги томонидан дастур ишлаб чиқарилди. Дастурда саммитнинг асосий йиғилишлари ўтказилганидан кейин меҳмонлар, делегация аъзолари ва юртимизга ташриф буюрган меҳмон давлатлар делегацияларига Ўзбекистоннинг туризм салоҳиятини, маданий мерос объектларини кўрсатиш ва таништириш, қолаверса, бизнинг бой маданий меросимиз ва миллий урф-одатларимизни, анъана ва қадриятларимизни кўрсатиш мақсадида ҳам университет хиёбонида катта маданият кўчалари ташкил қилинди. Ҳар бир давлатнинг урф-одати, анъаналари, кийиниши бу ерда мужассам бўлди», — дейди Рустам Қобилов

Ҳоким ўринбосарининг қўшимча қилишича, Самарқанд шаҳрида 22 та президент номерлари ташкил қилинган.

Умумий меҳмонхоналар таркибига эътибор қаратадиган бўлсак, Самарқанд шаҳрида 22 та президент номерлари ташкил қилинган. Шундан 16 таси халқаро туризм марказида. Қолган меҳмонхоналарнинг барчаси замонавий ва халқаро талабларга жавоб берадиган 3-4 юлдузли меҳмонхоналарни ташкил қилади. Самарқанд шаҳрида ўзи мустақил саёҳат қилишни истаганлар учун ҳам алоҳида дастур ишлаб чиқилган. Бу харита дастурини олган меҳмон Самарқанд шаҳрининг исталган нуқтасидан барча тарихий обидаларга, овқатланиш жойларига, музейларга бориш имкониятига эга бўлади. Бу китобча шаклида бўлиб, QR код орқали сайтга кириб, керакли манзилни осон топиб олади. Шунингдек, 9 та такси хизмати ҳам киритилган», — дейди масъул.

Ҳоким ўринбосарининг маълумот беришича, саммитга тайёргарлик олдидан мингдан зиёд маданий мерос объектлари ходимлари, умумий овқатланиш корхоналари ва шу билан биргаликда меҳмонхона хизматчилари туризм университетида ўқитилган.

Саммитга тайёргарлик кўриш жараёнида қарийб мингдан зиёд маданий мерос объектлари ходимлари, умумий овқатланиш корхоналари, шу билан биргаликда меҳмонхона хизматчиларини туризм университетида ўқитдик. 48 соатлик курсни ўтаган ходимлар ШҲТ саммити доирасида ўтказиладиган тадбирларни ўтказиш имкониятини берадиган сертификатларга эга бўлди. Ушбу сертификатлар шаҳримиздаги 16 та ресторанларида бор. Яъни, уларнинг менюлари ШҲТ давлатларининг тилларида ва уларнинг овқатланишига мос тарзда ишлаб чиқилди. Кўпчилик халқаро туризм маркази фақатгина ШҲТ саммитини ўтказиш учун қурилган деган фикрда юрибди. Бироқ, бу жой аввалдан Самарқанд шаҳрига кириб келувчи Чўпон ота тепалиги ва Зарафшон дарёси бўйидаги энг сўлим жой ҳисобланади. Бу ер байдарка ва каноеда эшкак эшиш бўйича халқаро мусобақалар ўтказиладиган республика эшкак эшиш каналида жойлашган. Саммит тугаши билан халқаро мусобақалар ва йиғилишлар ўтказиш бўйича буюртмалар қабул қилинмоқда. Хусусан, Фавқулотда вазиятлар вазирлиги томонидан Жаҳон чемпионати, триатлон бўйича Осиё чемпионати, енгил атлетика бўйича Ўзбекистон чемпионати ўтказилади. Ҳозирда айрим халқаро ташкилотлардан ушбу туристик марказда ишбилармонлик туризимини ташкил қилиш бўйича буюртмалар қабул қилинмоқда. Аниқ ишонч билан айта олманки, бу лойиҳанинг эртанги кундаги истиқболи порлоқ. 18 сентябрдан бошлаб турфирмалар меҳмонларини халқаро туризм маркази ва «Боқий шаҳар»га олиб боришлари мумкин», — дейди Рустам Қобилов.

Маълумот учун, «Буюк ипак йўли» халқаро туризм марказида умумий фонди 1200 га яқин хонага эга саккизта халқаро даражадаги меҳмонхона жойлашган. Улардан бири Samarkand Regency Amir Temur меҳмонхонаси бўлиб, Марказий Осиёдаги биринчи беш юлдузли меҳмонхона, жаҳоннинг етакчи меҳмонхоналари ассоциацияси – The Leading Hotels of the World рейтингига киради.

Мажмуада Марказий Осиёда илк бор Хитойнинг энг йирик меҳмонхона бошқарув компанияларидан бири бўлган, бош қароргоҳи Ченгду шаҳрида жойлашган Minyoun Group компаниясининг иккита меҳмонхонаси жойлашган. Беш юлдузли Silk Road by Minyoun меҳмонхонаси Буюк ипак йўли тарихига бағишланган. У 20 қаватли бинода жойлашган 241 та хонадан иборат.

Туристик марказда нафақат саёҳатчиларни, балки ишбилармон меҳмонларни ҳам кутиб олиш режалаштирилган. Конгресс маркази 18 минг квадрат метрлик функционал майдонга эга. Юқори технологияли залда 3500 иштирокчига мўлжалланган ўн учта конференция заллари мавжуд. Конгресс маркази биносига «Қуёш» номли кинетик ҳайкал ўрнатилган. Инсталяция муаллифи таниқли британиялик ҳайкалтарош, асли самарқандлик — Юнус Сафардиёр ҳайкал устида икки йил ишлаган. Композиция Шарқнинг чексиз саховатини ўзида мужассам этган.

Туристик марказининг яна бир йўналиши — соғломлаштириш туризми. Дам олиш масканининг тиббий кластери тўртта Веллнесс Парк меҳмонхоналари билан ифодаланади. Уларнинг ҳар бири кенг қамровли тиббий кўрикдан ўтказиш ва танани яхшилаш учун мўлжалланган дастурларга мувофиқ ишлайди. Мажмуа ҳудудининг учдан икки қисмини боғ ҳудуди эгаллаб, у ерда Германия, Бельгия, Италия ва Голландиядан 50 мингдан ортиқ атиргул, 30 минг туп дарахт ва юз минглаб буталар экилган.

«Буюк ипак йўли» халқаро туризм маркази 580 миллион долларга қуриб битказилган. 260 гектардан ортиқ майдонда 8 та меҳмонхона бўлиб, мажмуа меҳмонхоналарида бир вақтнинг ўзида 3000 кишини жойлаштириш мумкин. Ҳудуднинг 170 гектари яшил майдон, 20 километрини йўл ташкил этади. Мажмуа қурилишга 10 мингдан ортиқ мутахассислар жалб қилинган бўлиб, шаҳар марказидан 20 дақиқа узоқликда жойлашган.

Бугунги кунда Самарқандда ШҲТ меҳмонларини кутиб олиш учун 1551 та стандарт, 122 та люкс ва 22 та аппартамент хоналари мавжуд 31 та замонавий меҳмонхона тайёрланди. Ушбу меҳмонхоналар бир вақтнинг ўзида 1700 га яқин меҳмонни қабул қила олади. Шу билан бирга 981 ўринли 26 та меҳмонхона заҳирага олинган. Жами 57 та меҳмонхона саммит меҳмонларини кутиб олишга тайёр, — дейди вилоят ҳокими ўринбосари Рустам Қобилов.