Ижтимоий тармоқларда 13 сентябрь куни Пойи калон мажмуасида велосипедлар, одам ташувчи электрон велосипедлар жуда ҳам кўпайиб, тартибсиз ҳолга келиб қолгани айтилган мурожаат эълон қилинди. Ҳолат юзасидан Бухоро вилояти ИИБ ахборот хизмати муносабат билдирди.
Мурожаатда велосипедлар бир неча кишини уриб кетгани, туризм полицияси назорат қилмаётгани айтилган. Шунингдек, намоз вақтида ҳам мусиқа баландлатиб қўйилаётгани, велосипед ижарага олувчилар умуман эътиборсиз, одам гавжум жойда ҳам қувиб ҳайдаётгани, фуқаронинг боласини ҳам уриб, бошини ёргани, туризм полициясига айтилганда ҳокимият рухсат берганини билдиргани, ҳамма сайёҳлар эътироз қилаётгани маълум қилинган.
Қайд этилишича, ушбу хабарда кўрсатилган ҳолат бўйича Бухоро вилояти ички ишлар органлари ва бошқа ҳуқуқни муҳофаза қилувчи идоралар, вилоят ИИБ Хавфсиз туризмни таъминлаш бошқармасига ҳеч қандай мурожаат келиб тушмаган.
Ҳозирда мазкур ҳолатга аниқлик киритиш мақсадида вилоят ИИБ Хавфсиз туризмни таъминлаш бошқармаси томонидан қўшимча ўрганишлар олиб борилмоқда. Ўрганиш давомида бирор бир ҳуқуқбузарлик ҳолатлари аниқланса, айбдор шахсга нисбатан қонунда белгиланган тартибда чора кўрилади.
Юқорида келтирилган ҳолат ёки шунга ўхшаш ҳолатларда Бухоро вилояти Ички ишлар бошқармасининг 102 қисқа рақамли электрон тизимига ёки Хавфсиз туризмни таъминлаш бошқармасининг (65) 220-41-80 рақамига қўнғироқ қилиб хабар беришингизни сўраб қоламиз, — дейилади хабарда.
Изоҳ (0)