O‘zbekistonda 2022-yil 1-sentabr holatiga faoliyat ko‘rsatayotgan xorijiy kapital ishtirokidagi kompaniyalar soni 14 706 tani tashkil etgan. Bu haqda Davlat statistika qo‘mitasi xabar berdi.
Chet el kompaniyalari soni o‘tgan yilning mos davriga nisbatan 1 617 taga ko‘paygan.
Faoliyat ko‘rsatayotgan xorijiy kompaniyalarning 6 311 tasi qo‘shma korxonalar, 8 395 tasi esa xorijiy korxonalar hisobiga to‘g‘ri keldi.
Rossiya kapitali ishtirokida tashkil etilgan chet el kompaniyalari 2 762 tani tashkil qilib, yetakchi bo‘lib turibdi. Bir yil avvalgiga nisbatan 2 071 ta kompaniya bilan Turkiya Xitoyni ortda qoldirib ikkinchi o‘rinni egallagan. Uchinchi o‘rinda Xitoy qayd etilgan — 2 044 ta.
Hududlar kesimida eng ko‘p chet el kompaniyalari soni Toshkent shahriga to‘g‘ri kelmoqda — 5 701 ta. Bu qolgan barcha viloyatlardagi umumiy xorijiy kompaniyalar sonidan ham ko‘p.
Yangi tashkil etilgan Rossiya kompaniyalari soni keskin ko‘paygan. O‘tgan yilning dastlabki 8 oyida ushbu davlat kapitali ishtirokida 248 ta korxona tashkil etilgan bo‘lsa, 2022-yilda bu ko‘rsatkich 2 barobardan ko‘proq oshib 529 tani tashkil qilgan.
Bu Ukrainada urush boshlangandan keyin ko‘plab rossiyalik tadbirkorlar Rossiyani tark etish, o‘z bizneslarini boshqa davlatlarga ko‘chirishga qaror qilganliklari bilan izohlanadi.
Turkiya kapitali ishtirokidagi yangi kompaniyalar soni esa o‘tgan yilga nisbatan 45 taga kamayib, 225 tani tashkil qilmoqda.
Turkiya iqtisodiyoti so‘nggi yillarda iqtisodiy inqiroz tufayli qiyinchiliklarni boshdan kechirmoqda. Turk tadbirkorlari xalqaro bozorlarga chiqish orqali buni qoplashga harakat qilmoqda.
2022-yil yanvar—avgust oyida yangi tashkil etilgan korxona va tashkilotlar soni 2017- yilning mos davri bilan solishtirilganda 3,5 barobarga oshgan.
Avvalroq Rossiya ishbilarmonlarining O‘zbekistonga xizmat safarlari soni oshgani haqida xabar berilgan edi.
Izoh (0)