Ўзбекистонда 2022 йил 1 сентябрь ҳолатига фаолият кўрсатаётган хорижий капитал иштирокидаги компаниялар сони 14 706 тани ташкил этган. Бу ҳақда Давлат статистика қўмитаси хабар берди.
Чет эл компаниялари сони ўтган йилнинг мос даврига нисбатан 1 617 тага кўпайган.
Фаолият кўрсатаётган хорижий компанияларнинг 6 311 таси қўшма корхоналар, 8 395 таси эса хорижий корхоналар ҳисобига тўғри келди.
Россия капитали иштирокида ташкил этилган чет эл компаниялари 2 762 тани ташкил қилиб, етакчи бўлиб турибди. Бир йил аввалгига нисбатан 2 071 та компания билан Туркия Хитойни ортда қолдириб иккинчи ўринни эгаллаган. Учинчи ўринда Хитой қайд этилган — 2 044 та.
Ҳудудлар кесимида энг кўп чет эл компаниялари сони Тошкент шаҳрига тўғри келмоқда — 5 701 та. Бу қолган барча вилоятлардаги умумий хорижий компаниялар сонидан ҳам кўп.
Янги ташкил этилган Россия компаниялари сони кескин кўпайган. Ўтган йилнинг дастлабки 8 ойида ушбу давлат капитали иштирокида 248 та корхона ташкил этилган бўлса, 2022 йилда бу кўрсаткич 2 баробардан кўпроқ ошиб 529 тани ташкил қилган.
Бу Украинада уруш бошлангандан кейин кўплаб россиялик тадбиркорлар Россияни тарк этиш, ўз бизнесларини бошқа давлатларга кўчиришга қарор қилганликлари билан изоҳланади.
Туркия капитали иштирокидаги янги компаниялар сони эса ўтган йилга нисбатан 45 тага камайиб, 225 тани ташкил қилмоқда.
Туркия иқтисодиёти сўнгги йилларда иқтисодий инқироз туфайли қийинчиликларни бошдан кечирмоқда. Турк тадбиркорлари халқаро бозорларга чиқиш орқали буни қоплашга ҳаракат қилмоқда.
2022 йил январь—август ойида янги ташкил этилган корхона ва ташкилотлар сони 2017- йилнинг мос даври билан солиштирилганда 3,5 баробарга ошган.
Аввалроқ Россия ишбилармонларининг Ўзбекистонга хизмат сафарлари сони ошгани ҳақида хабар берилган эди.
Изоҳ (0)