2022-yil iyul oyida Rossiyadan AQSHga qora metallar importi deyarli nolga tushdi. Bu haqda AQSH aholini ro‘yxatga olish byurosi ma’lumotlariga tayanib, “RBK” xabar bermoqda.
Ma’lum bo‘lishicha, iyul oyida AQSH Rossiyadan 600 ming dollarlik qora metall sotib olgan. Iyun oyida bu ko‘rsatkich 201 million dollarni tashkil qilgan edi.
2021-yilda Rossiyadan qora metallar yetkazib berishning 9 foizi AQSH hissasiga to‘g‘ri kelgan edi.
O‘tgan yili AQSH Rossiyadan 2,77 milliard dollarlik (oyiga o‘rtacha 230 million dollar) qora metallar import qilgan.
Qora metallarni xarid qilish 7-aprel kuni AQSH Rossiyadan savdodagi eng qulay davlat maqomini olib tashlaganidan keyin kamaydi. Iyun oyida po‘lat va bir necha turdagi po‘lat mahsulotlariga import tarifi 35 foizgacha ko‘tarildi.
Aprel oyidan beri sanksiyalar va tariflar qo‘llanmagan metallar yetkazib berish ham kamaydi. Rossiyaning platina guruhi metallarining (palladiy, platina, rodiy) AQSHga importi iyul oyida 34 million dollarni tashkil etdi.
Bu esa iyun oyidagi 76 million dollar va may oyidagi 258,5 million dollarga qaraganda ancha kam. Dunyo bo‘ylab birlamchi palladiy yetkazib berishning qariyb 40 foizi Rossiya hissasiga to‘g‘ri keladi.
Hindiston iyun va iyul oylarida Rossiyadan po‘lat xarid qilishni oshirdi. Hindiston bojxona ma’lumotlariga ko‘ra, iyul oyida Rossiyadan qora metallar (TNVED 72) importi yillik ko‘rsatkichlarda besh baravarga o‘sdi — 29,7 ming tonnagacha.
Izoh (0)