Andijonda 21 yoshli taksichi yigit u bilan yo‘lovchi talashgan 54 yoshli fuqaroga chopqi bilan og‘ir tan jarohati yetkazdi. Voqea 2022-yil 9-sentabr kuni Qo‘rg‘ontepa tumani markazidagi Qo‘rg‘ontepa—Norbo‘ta yo‘nalishida taksilar turadigan joyda sodir bo‘lgan. Bu haqda “Daryo” muxbiri xabar bermoqda.
Ma’lum qilinishicha, 9-sentabr kuni soat 10:00 lar atrofida Damas haydovchilari — “Norbo‘ta” mahallasida yashovchi 2001-yilda tug‘ilgan yigit va 1968-yilda tug‘ilgan erkak o‘z yo‘nalishi bo‘yicha birin-ketin ketayotgan vaqtida yo‘lovchi olish maqsadida yo‘l talashgan. Natijada ikkalasi o‘rtasida nizo kelib chiqqan. Erkak tomonidan haqoratli so‘zlar ishlatilgan. Oqibatda 2001-yilda tug‘ilgan fuqaro do‘kondan chopqi sotib olib, avtomashinalar turgan joyga borib, chopqining o‘tkir qismi bilan 54 yoshli erkakka og‘ir tan jarohati yetkazgan. Shifokorlarning ko‘rsatgan tibbiy yordami bilan jabrlanuvchining hayoti saqlab qolingan bo‘lsa-da, og‘ir ahvolda tuman shoshilinch tibbiy yordam bo‘limiga yotqizilgan.
Ushbu holat bo‘yicha Qo‘rg‘ontepa tuman prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan. Hozirda tergov harakatlari olib borilmoqda.
10-sentabr kuni Andijon viloyati prokurori Sirojiddin Eshquvvatov boshchiligida tumandagi sektor rahbarlari, mas’ullar va hudud aholisi ishtirokida hodisa muhokamasi o‘tkazilgan. Unda so‘nggi paytlarda sodir bo‘layotgan jinoyatlarning aksariyat qismi arzimas sabablar ortidan yuzaga kelayotgani, bu kabi jinoyatlar takrorlanmasligi uchun huquq-tartibot idoralari va fuqarolarning o‘zaro hamkorligi zarurligi haqida so‘z borgan.
“Arzimagan besh ming so‘m uchun mana shunday holatning yuzaga kelishi achinarli. Aslida arzimagan deyishimiz ham noto‘g‘ri. Boisi ikkalasi ham hayot kechirishi, bola-chaqasini boqish, oilasiga daromad qilish uchun harakat qilgan. Lekin shu bir fuqaroni yo‘l-yo‘lakay olib borib qo‘yishgacha to‘lanadigan 5 ming so‘m uchun bo‘layotgan holat oqibatida bitta inson shifoxonada ahvoli og‘ir holatda yotishga, ikkinchi fuqaro esa qotillik suiqasd jinoyati uchun ish bo‘yicha tergovga jalb qilingan”, — deydi viloyat prokurori Sirojiddin Eshquvvatov.
Izoh (0)