Shanxay hamkorlik tashkiloti o‘z mohiyatiga ko‘ra, tinchlik, hamkorlik va taraqqiyot yo‘lida birlashishga, ayirmachilik unsuridan xoli bo‘lgan jozibador makonga aylanishi lozim. Bu haqda Shavkat Mirziyoyev SHHT Samarqand sammitiga bag‘ishlangan maqolasida qayd etib o‘tgan.
Davlat rahbarining so‘zlariga ko‘ra, bugungi kunga kelib hamjamiyati ulkan geografik makonni qamrab olgan va dunyo aholisining qariyb yarmini birlashtirgan, dunyodagi eng yirik mintaqaviy tashkilot bo‘lgan SHHTning muvaffaqiyat garovi mintaqaviy xavfsizlikni ta’minlash orqali ko‘p tomonli hamkorlikni ilgari surishdadir.
Tashkilot o‘z mohiyatiga ko‘ra, tinchlik, hamkorlik va taraqqiyot yo‘lida birlashishga, ayirmachilik unsuridan xoli bo‘lgan jozibador makonga aylanishi lozim. Shu sababli ham SHHT faoliyatiga qo‘shilish istagidagi davlatlar soni yildan yilga ortib bormoqda. Bu tendensiya xalqaro va mintaqaviy munosabatlar tizimi transformatsiya jarayonini boshidan kechirayotgan bugungi sharoitda yaqqol ko‘zga tashlanmoqda.
Shavkat Mirziyoyevning ta’kidlashicha, SHHT makonidagi davlatlarning yuksak insoniy, intellektual va texnologik salohiyatga, jadal rivojlanayotgan iqtisodiyotlarga va hali to‘laqonli foydalanilmagan tabiiy zaxiralarga ega ekani tashkilotning iqtisodiy ahamiyatini yanada oshirishga xizmat qiladi
“Bugungi kunda SHHTga a’zo davlatlar yalpi ichki mahsulotining umumiy hajmi jahon ko‘rsatkichining qariyb chorak qismini tashkil qilmoqda. Bu esa endigina 20 yoshga to‘lgan ushbu mintaqaviy Tashkilot tomonidan dunyoning barqaror rivojlanishiga qo‘shilayotgan hissasining salmog‘i yuksak ekanidan dalolat beradi”, — degan prezident.
Eslatib o‘tamiz, Samarqanddagi SHHT sammitida 15 ta davlat rahbarlari ishtirok etadi. Tashkilot bosh kotibi Chjan Mina Belarus SHHTga a’zo bo‘lish uchun ariza topshirganini ma’lum qilgandi. Respublikani SHHT a’zoligiga kiritish tartibini boshlash to‘g‘risidagi qaror Samarqandda bo‘lib o‘tadigan sammitda qabul qilinadi. Sammitda Eron yangi doimiy a’zo sifatida tanishtirilishi kutilmoqda.
Izoh (0)